Алтынньы ый 17-18 күннэригэр Дьокуускайдааҕы үп уонна экономика коллеһын базатыгар «2024 сыл бастыҥ устудьуона» бүтүн Арассыыйатааҕы күрэх региональнай этээбэ буолан ааста. Бу күөн күрэскэ Н.Е.Мординов-Амма Аччыгыйа аатынан Харбалаахтааҕы үөрэхтээһин холбоһугуттан икки устудьуон кыттан, бэйэлэрин кыахтарын холонон көрдүлэр.
Кинилэр кимнээҕий?
Александр Оконешников «Баһаарынньык-23» группа устудьуона, Василий Слепцов «Аһаҕас хайа үлэтин машиниһа» идэ үһүс куурсун устудьуона. Устудьуоннары бу күрэххэ бэлэмнээн кытыннардылар директоры иитэр үлэҕэ солбуйааччы Н.Е.Большакова, директор советнига В.В. Захарова,уопсай дьиэ иитээччитэ М.В. Цой.
Күрэхтэһээччилэр икки күн устата маннык этаптарга ситиһиилээхтик кытыннылар:
1.»Мин идэм»
2.»Аһаҕас уруок»
3. «Бэйэни билиһиннэрии»
4. «Дьыалабыай оонньуу.»
Тургутук
«Аһаҕас уруок» этээпкэ кыттарыгар
Александр Оконешниковы ох сааҕа дьарыктыыр энтузиаст- тириэнэрэ Ньургун Иванович Тистяхов бэйэтинэн кэлэн өйөөн, сүбэ-ама буолбутугар олус үөрдүбүт уонна махтанныбыт.
Уолаттар иккиэн да олус үчүгэйдик, кыһаллан туран, кытыннылар.
Уопсай түмүккэ, Александр Оконешников «Сыл бастыҥ устудьуона 2024» күөн күрэс «Сыл бастыҥ спортсмена» номинациятыгар 2-с миэстэни ылан, Харбалаахтааҕы үөрэхтээһин холбоһугун өрөспүүбүлүкэ таһымыгар дорҕоонноохтук ааттатта, эрэлбитин түһэн биэрбэтэ. Кэлэктиип аатыттан Александры ситиһиитинэн эҕэрдэлиибит!
Маннык ситиһиилэртэн тирэҕирэн, үүнэн-үрдээн ис диэн алгыыбыт!
Устудьуоннар идэлэригэр эппиэтинэстэрин үрдэтэр маннык күрэхтэр сылтан-сыл ыытыллан, тэнийэн-кэҥээн истиннэр!
Надежда Большакова, иитэр үлэҕэ директоры солбуйааччы.