Орто анал үөрэх күнүн чэрчитинэн Н.Е.Мординов — Амма Аччыгыйа аатынан Харбалаахтааҕы үөрэхтээһин холбоһугун лиссиэйин маҥнайгы кууруһун устудьуоннара Харбалаахха баар идэлэригэр сыһыаннаах тэрилтэлэргэ экскурсияҕа сылдьан, үгүһү билэн-көрөн, астынан кэллилэр.
Хайаны байытар үлэ массыыналарыгар үөрэнэр студеннары Ил Түмэн дьокутаата Прокопий Дмитриевич Рахлеев генеральнай директордаах «Төлөн» ААО кэлэктиибэ үөрэ көрсөн, чоҕу хостуурга туттуллар техникалары көрдөрдүлэр, үлэһиттэр студеннарга үлэлэрин сүрүн ис хоһоонун билиһиннэрдилэр.
Баһаарынай идэтигэр үөрэнээччилэр олохтоох МПЧ тэрилтэҕэ сырыттылар. Максим Дмитриевич Антоев салайааччылаах баһаарынайдар үлэлэрин билистилэр. Баһаарынай массыына хайдах үлэлиирин көрөн, идэлэрин туһунан бастакы өйдөбүлү ыллылар.
«Тыа хаһаайыстыбатын маастара» идэҕэ үөрэнэр студеннар «Төҥүттэ» алааһыгар олохсуйан, үлэлии турар Василий Константинович Татаринов салайааччылаах «Хочо» бааһынай хаһаайыстыбатыгар ыалдьыттаатылар. Былырыын тутуллан киирбит аныгылыы ирдэбилгэ толору эппиэттиир хотоннору, үлэһиттэр олорор, сынньанар усулуобуйаларын билсэн, сөҕө-махтайа көрдүлэр. Барыта техника көмөтүнэн үлэлиир ферманы көрөн, элбэҕи билэн кэллилэр. Мантан инньэ талбыт идэлэрин сүрүн хайысхатыгар үөрэнэ, быраактыкалана элбэхтик сылдьар буолуохтара.
Устудьуоннарга бүгүн сонун үөрэх күнэ тэриллэн, үгүһү билэн-көрөн, талбыт идэлэрин туһунан билсэн кэлбиттэрэ туһалаах буолуо диэн эрэнэбит. Кинилэри салайан илдьэ сырыттылар маастардар: Андрей Альбертович Громов, Людмила Андреевна Татаринова, Елена Васильевна Малышева, Ирина Романовна Федорова.
Устудьуоннарбытын үөрэ-көтө көрсүбүт Харбалаахпыт уйуктаах, дьоһун тэрилтэлэрин үлэһиттэригэр холбоһук салалтатын аатыттан махталбытын тиэрдэбит!
Үөрэх — производство салаатын салайааччыта Ульяна Васильевна Егорова, Харбалаах.