Олунньу 21 күнүгэр Россияҕа Дьиэ кэргэн, Саха сиригэр Оҕо саас, Тааттаҕа Эрэл, Таптал, Итэҕэл сыла биллэриллибитин бэлиэтээн, Уолба «Кэнчээри» уһуйаан иһинэн «Ийэм, аҕам уонна мин» көрдөөх эстафета ыытылынна. Улахан бөлөхтөн, кыра бөлөхтөн дьиэ кэргэттэр хамаандалара ох курдук оҥостон биир тэҥ таҥастаах парадтаан киирэн, девизтэринэн бэйэлэрин билиһиннэрдилэр. Тыҥааһыннаах күрэхтэһиигэ биирдиилээн дьиэ кэргэнинэн түмүк таҕыста.
Ол курдук орто бөлөхтөн I миэстэҕэ Ева, Елена, Иван Беляевтар дьиэ кэргэн, II миэстэҕэ Модест, Розалия, Модест Баишевтар дьиэ кэргэн, III миэстэҕэ Арчын-Арчылаан Саинна, Эрсан Рахлеевтар дьиэ кэргэн хамаандалара кыайыы өрөгөйүн биллилэр.
Улахан бөлөхтөн I миэстэҕэ Арина, Алёна, Виталий Петровтар дьиэ кэргэн, II миэстэҕэ Аделина, Алина, Айсен Рахлеевтар дьиэ кэргэн, III миэстэҕэ Василина, Екатерина, Максим Рахлеевтар дьиэ кэргэн тахсан ситиһиилиин сиэттистилэр. Ону тэҥэ Эрчим, Туйаара, Михаил Старковтар, Дьулустаан, Иванна, Уйгун Рахлеевтар көхтөөх кыттыыларын иһин биһирэбил бириис туттулар.
Бу тэрээһин Аҕа дойдуну көмүскээччилэр күннэрин кытта сэргэ ыытыллан, оҕолор бары строевой хааман көрдөрдүлэр, ырыа ыллаан, бэйэлэрэ оҥорбут открыткаларын туттаран аҕаларын, эһээлэрин, убайдарын эҕэрдэлээтилэр. Дьиҥ чахчы дьиэ кэргэн бырааһынньыгар оҕолор төрөппүттэринээн кыттан үөрүүлэрэ үксээтэ, чугас дьонунан киэн тутталлара, холобур оҥостоллоро күүһүрбүтэ саарбаҕа суох буолла.
Кэнчээри уһуйаан иитээччилэрэ: Бочурова Нь.С., Карбаканова Е.Г.