Балаҕан ыйын бастакы күнэ – Билии аан дойдутааҕы күнэ. Бу күн үөрэх-билии сырдык аартыгар сирдиир, үтүөҕэ-кэрэҕэ угуйар Таатта улууһун А.И.Софронов – Алампа аатынан Ытык Күөл 1-гы нүөмэрдээх орто оскуолата, «ЮНЕСКО» ассоцированнай оскуолалартан биирдэстэрэ, быйылгы үөрэх дьылыгар 887 үөрэнээччилээх үөрэх дьылын арыйда, кинилэри 82 учуутал айымньылаахтык билии суолугар сирдиэхтэрэ.
Үөрүүлээх чааһы ОБЖ учуутала Ирина Тарасенко салайааччылаах«Бэргэн» байыаннай-патриотическай кулууп иитиллээччилэрэ, оскуола 11 кылаас үөрэнээччилэрэ Эрхаан Андросов, Дайаана Гуляева, Егор Иванов, Юрий Прудецкай Арассыыйа былааҕын күөрэччи таһаардылар.
Оскуола аныгы үөрэх ирдэбилинэн техническэй, гуманитарнай, социально-экономическэй, медицинскэй хайысхаларга туһаайан үөрэтэр. Ол курдук 2023 сылга Дьокуускайдааҕы медицинскэй колледжы кытары ыкса үлэлээн, оскуола 11 выпускнига бу идэни талан үөрэххэ киирдилэр.
Быйыл, Арассыыйа бэрэсидьиэнэ Владимир Путин ыйааҕынан «Уһуйааччы уонна Аҕа сүбэһит” сылынан биллэриллибитэ, оскуола Аҕа сүбэһит оруолун үөрэх, иитии хаачыстыбатын үрдэтиигэ тиһигин быспакка үлэлиир.
Быйылгы үөрэх дьылыгар Алампа аатынан оскуолаҕа үс маҥнайгы кылаас аһылынна. Оскуола боруогун аан маҥнай атыллаан, үөрэх — билии киэҥ аартыгар 75 үөрэнээччи үктэннэ. Кинилэргэ СӨ Ил Дархана Айсен Николаев аатыттан икки тылынан суруллубут күннүктэри (дневник) бэлэх ууннулар. Оскуоланы бүтэрэр, олох киэҥ аартыгар үктэнэр, ситии-хотуу аттестатын 50 үөрэнээччи ылыаҕа.
Оскуола дириэктэрэ Анна Мосоркина оскуола үөрэнээччилэрин, төрөппүттэрин, учууталларын, педагогическэй үлэ бэтэрээннэрин уонна ыҥырыылаах ыалдьыттары Билии күнүнэн эҕэрдэлээтэ. “Ааспыт үөрэх дьылыгар оскуоланы 33 оҕо, олор истэригэр үс оҕо кыһыл көмүс мэтээлинэн бүтэрбиттэрэ уонна 100 бырыһыан үөрэххэ киирдилэр. Оскуола бэдэрээлинэй бырайыакка киирэн өрөмүөннэннэ, барыта 56 мөл. 805 тыһ.солк. үлэ ыытылынна. Ол курдук үөһээҥҥи кырыыһа саҥардылынна, саҥа пластик түннүктэр турдулар, уот-күөс саҥалыы тардылынна. Буоларын курдук быйылгы үөрэх дьылыгар түөрт саҥа учууталынан эбилиннибит, ол курдук информатика, ИТ технология, социальнай педагог уонна «Советник директора» диэн иитэр үлэни салайар уонна оскуолаҕа оҕо тэрилтэлэрин кытта үлэлэһэргэ. Маны таһынан оскуола граннарга үлэлэһэр “Отходы — в доходы”, «Движение Первых», быйылгы үөрэх дьылыгар маҥнайгы кылаастарга инженернай, үрдүкү кылаастарга педагогическай кылаастар аһыллан үлэлиэхтэрэ”, диэн бэйэтин этиитигэр эттэ.
Тэрээһиҥҥэ улуус баһылыга Михаил Соров саҥа үөрэх дьыла саҕаламмытынан үөрэнээччилэри, кэллэктииби эҕэрдэлээтэ: «Оскуола айымньылаахтык, таһаарыылаахтык үлэлиир, Арассыыйа бэрэсидьиэнин граныгар өрөспүүбүлүкэҕэ 12 учуутал граҥҥа тиксибититтэн биирдэстэрэ, эһиги биологияҕа учууталгыт Аравелла Пинигина (Сосина) буолар, онон улуус киэн туттар”, диэтэ.
Маны таһынан кыттыыны ыллылар СӨ үөрэххэ уонна билимҥэ миниистирин солбуйааччы Владимир Тихонов, «Саханефтегазсбыт” АУо генеральнай дириэктэрэ, СӨ народнай депутата Виктор Лебедев, МТ улуустааҕы сэбиэтин депутата, “Төлөн” аһаҕас акционернай тэрилтэ генеральнай дириэктэрэ Прокопий Рахлеев, Таатта улууһун Прокурорун солбуйааччыта Дмитрий Васильев, улуустааҕы үөрэх салаатын начальнига Владимир Кривошапкин кыттыыны ыллылар.
Сырдыкка, кэрэҕэ угуйан үөрэх, билии киэҥ аартыгар аан бастаан үктэммит Алампа аатынан оскуола маҥнайгы кылааһын үөрэнээччилэрэ хоһооннорун толордулар. Быйылгы үөрэх дьылын саҕалыыр маҥнайгы алтан чуораана чугдаарда, билиигэ-көрүүгэ ыҥырда.
Елена Слепцова.