Саха сирин дьоно-сэргэтэ анал байыаннай эпэрээссийэҕэ инники кирбиигэ сылдьар дьоммутугар туох кыалларынан көмөнү оҥорууга кытта олорор.
Светлана Владимировна Диодорова-Лаврентьева салайар Аҕа дойду буойуннарын дьиэ кэргэннэрин кэмитиэтин чилиэннэрэ Николай Николаевич Мочкин, Вера Петровна Душкевич бу күннэргэ Луганскай Народнай Республикатын (ЛНР) баһылыгын эбээһинэһин толорооччу Леонид Иванович Пасечкин илии баттааһыннаах государственнай наҕараадатын «От благодарного народа ЛНР» бочуоттаах бэлиэни туттулар. Наҕарааданы ЛНР народнай сэбиэтин депутата, боевой братство представителэ Юрий Александрович Резанов сүрүннээтэ, анал байыаннай эпэрээссийэҕэ сылдьар биир дойдулаахпыт Эдик Фролов хаартыскалаан, суруйан ыытта.
Байыаннай дьайыылар буола турар сирдэригэр сылдьар биир дойдулаахпыт Николай Николаевич Мочкин, бэйэтэ суоппар идэлээх, ыраах айан суоппардарын түмсүүтүн салайааччыта. Кини анал байыаннай дьайыыга оҕотун сүтэрбит аҕа буолар. Бу сайынтан анал дьайыыга көмөҕө сылдьар, тиийэн саллаат уолаттары көрсөн, сахалыы кэпсэтэн, санааларын бөҕөргөтөн, күүһэ тиийэринэн көмөлөһөр. Николай Николаевич Донецкай уобаласка Новоазовскай оройуоҥҥа механик-водителинэн үлэлиир. Кини Саха сириттэн тиийбит гуманитарнай көмөнү анал куораттарынан таһар. Бу күннэргэ, Николай Николаевич «массыынаны соһорго быдан табыгастаах канат атыылаһан ыытаргыт буоллар» диэн көрдөһүүтүн ылынан, ыраах айаҥҥа сылдьар, ыарахан уйуктаах тимир көлө суоппардара харчы хомуйан, канат атыылаһан ыыппыттара.
Онтон, Вера Петровна Душкевич утуйар уутун умнан туран үлэлиир. Кини, ааспыт сыллаахха хомондьуруопкаҕа икки хоно кэлэн баран, бааһырбыт дьоммутугар көмө, өйөбүл наадатын көрөн хааларга быһаарыммыт. Вера Петровна байыаннай госпитальга үлэлиир. Инники кирбииттэн бааһыран кэлбит саллааттары көрсөр, ааттарын-суолларын билэр, сибээс олохтуур. Наада буоллаҕына таҥаһынан-сабынан, төлөпүөнүнэн, туох наадатынан хааччыйар. Уопсайынан, киһи тылынан кыайан эппэт хорсун, амарах санаалаах Вера Душкевич, бэйэтин баҕатынан үлэ үөһүгэр сылдьар.
Елена Слепцова.