Өбүгэлэриҥ улуу олоҥхоһуттар оһуор тылларынан ойуулаабыт Ньургун Боотур кэриэтэ эр бэрдин кыайыы аргыстаах аартыгынан айаннаан төрөөбүт төрүт түөлбэтигэр Туора Күөлгэ эргилиннэ.
Үрүҥ Уоланныы өстөөҕү самнарар харса суох хабыр санаата сүрэҕигэр тиҥийэр Дьүлэй чулуу уолун нэһилиэк эр дьоно айхаллыы нэһилиэккэ киирии аартыгар көрүстүлэр.
Үөрэммит оскуолата үөрэнээччитин долгуйа күүттэ. Родимир үөрэх- билии кыһатын ааны арыйаатын кытта оҕолор учууталлар айхаллыы көрүстүлэр.
Арыылаах алаадьынан, саламаатынан айах туттулар. Родимир Аал Луук маска салама ыйаата. Онтон оскуолаҕа мустубут дьон бары Геройга аналлаах стенд арыллыытын туоһуларынан буоллулар.
Стенд туһунан Родимир Дмитриевич ийэтэ Варвара Николаевна уонна быраата Вадим кэпсээтилэр.
Ити кэннэ оскуола кэрэ сиригэр- актовай саалаҕа оҕолор Геройу кытта ирэ- хоро алтыстылар. Герой паартатын арыйыы долгутуулаах түгэнэ буолла.
Лилианна Егорова.