Дойду тэбэр сүрэҕэр Арассыыйа Бэрэсидьиэнэ Владимир Путин сорудаҕынан «Төрүт күүһэ – Россия күүһэ” Бүтүн Арассыыйатааҕы муниципальнай пуорум тохсунньу 14 – 16 күннэригэр буолан ааста. Муниципальнай сулууспа оруолун үрдэтэр уонна муниципалитеттар күүстэрин сомоҕолуур сыаллаах пуорум өрөспүүбүлүкэ улуустарыттан уонна сэлиэнньэлэриттэн 155 баһылыгы түмтэ.
Муниципальнай пуорумҥа дойду үрдүнэн барыта 7,5 тыһыынча баһылык биир сиргэ түмсэн уопут атастастылар. Ол туһунан Таатта улууһун Октябрьскай нэһилиэгин баһылыга Андрей Семенов бу курдук кэпсээтэ:
«Таатта улууһун баһылыга Айаал Бурцев салалтатынан биэс нэһилиэктэр баһылыктара буолан кыттан кэллибит. Тэрээһин ВДНХ-ҕа буолла, дьыалабыай бырагыраамаҕа үс дискуссия былаһаакката, 65 төгүрүк остуол, 19 лекция, бырайыактар презентациялара тэрилиннилэр. ТКО секциятыгар кытынныбыт, кыһалҕалаах тоҥ отходпут туһунан санаабытын, этиилэрбитин эттибит. “Молодежь в селе”, “Комплексное развитие территорий” секцияларга кытынныбыт. Арассыыйа атын субъектарын үлэҕэ ситиһиилэрин туһунан билистибит. Маны сэргэ федеральнай былаас бэрэстэбиитэллэрин кытта көрсүһүүлэр буоллулар. Олус элбэҕи иһиттибит, биллибит, Арассыыйа сокуоннарыгар элбэх уларыйыы киирэрин, Тыа сирэ куорат олохтоохторуттан итэҕэһэ суох сайдыахтааҕын иһитиннэрдилэр. Пуорум бүппүтүн кэннэ, Вишневскай аатынан национальнай медицинскэй чинчийэр хирургическэй кииҥҥэ Харбалаахтан төрүттээх биир дойдулаахпытын көрүстүбүт», — диэн санаатын үллэһиннэ.
Елена Слепцова.