НКО дьахталлара — саамай актыыбынай, эппиэтинэстээх, эрчимнээх уонна позитивнай буолаллар.
Атырдьах ыйын 17-18 күннэригэр дьахталлар – лидердэр бастакы Бүтүн Арассыыйатааҕы пуорумугар мустан араас хайысхалаах былаһаакканан үлэлээтилэр уонна Бастакы дьахталлар национальнай профессиональнай бириэмийэлэрин «Женщины НКО» кыайыылаахтарын наҕараадалаатылар.
Бу бириэмийэни АНО «Планерка» НК уонна социальнай бизнес идэлээхтэрин кулууптара, «Серебренный экспресс» социальнай- культурнай инициативаны сайыннарыыга көмөлөһөр пуонда олохтоон Бүтүн Арассыыйатааҕы таһымыгар таһаарда. Ол курдук 8 номинацияҕа 505 кыттааччы баҕатын биллэрбит, онтон 225 кыттааччы салҕыы видеовизитка уонна тэрилтэ ситиһиитин туһунан кэпсиир презентация оҥорон ыытта. 120 кыттааччы полуфиналга киирэн, 88 кыайыылаах аатын сүктэ. Бириэмийэ экспертнэй Сэбиэтигэр РФ Госдуматын депутаттара, РФ уопсастыбаннай палататын уонна Москуба уобалаһын общественнай палататын бэрэстэбиитэллэрэ, НКО эйгэтигэр тиэрдэр граноператордар бэрэстэбиитэллэрэ киирдилэр.
Саха сириттэн бу бириэмийэҕэ 3 НКО кыайыылаах аатын сүгэн дойду тэбэр сүрэҕэр Москубаҕа баран кэллибит. Ольга Кардашевская «Коркинец» Чурапчы улууһун оҕолорун сайдыытыгар уонна олоххо киллэриигэ олохтоох дьаһалта бэрэссэдээтэлэ, Валентина Гаврильева Өлөөн улууһуттан ОО «Совет ветеранов» бэрэссэдээтэлэ уонна мин Дианна Соломонова Таатта улууһуттан ТОС “Теплица” бэрэссэдээтэлэ.
Мин кыттыбыт номинациябар “Экология и защита животных” финалга 7 кыттааччы баарыттан кыайыылаах ааты сүктүм. Бу бириэмийэҕэ кыайыы миэхэ улахан эрэли үөскэттэ, төрөөбүт өрөспүүбүлүкэбинэн, улууспунан, нэһилиэкпинэн улаханык киэн туттабын.
Москубаҕа буолбут коммерческайа суох сектор бэрэстэбиитэллэрин пуорума, Арассыыйа 59 регионуттан араас дьарыктаах общественнай тэрилтэлэри муста. Дьон- сэргэ араас кыһалҕатын быһаарар ону кытта ыкса үлэлэһэр, бэйэ көҕүлээһининэн араас бырайыактарынан кыттан олоххо киллэрэн, күннэтэ дойдуларын сайыннара тураллара, уопсастыба туһугар үлэлии-хамсыы сылдьаллара истэргэ олус үчүгэй. Бэйэбит Сахабыт сирин олоҕун-дьаһаҕын, үгэспитин, НКО өттүгэр кэнники сылларга сайдыы баран иһэрин туһунан сиһилии сырдаттыбыт.
Сэлиэнньэҕэ дьахталлар төһө үтүөнү оҥорор кыахтаахтарын итэҕэйдим: аҕа саастаах дьоҥҥо, бэтэрээннэргэ, инбэлииттэргэ, дьоҥҥо көмөлөһөр, төрөөбүт дойдубут олохтоохторугар национальнай үгэстэри, историческай пааматынньыгы харыстыыр дьоҥҥо көмөлөһөр, айылҕаны харыстыыр….
Махтанабын, миигин өйөөбүт дьоммун, куруук аттыбар баар чугас аймахтарбын, түөлбэм, нэһилиэгим олохтоохторугар.
НКО дьахталлара диэн бэйэни салайыныыга кыаҕы биэрэр ураты эйгэ, онуоха дьоҥҥ о- сэргэҕэ көмөлөһөр кыаҕы биэрэр. Мин, олус үөрэбин кини сорҕото буолан, тулалыыр эйгэ күннэтэ тупсарыгар туруулаһарбыттан.
Дианна Соломонова.