«Бары бииргэ! Биир сомоҕо!»

Бу күннэргэ Тыараһа анал коррекционнай оскуолатыгар «Бары бииргэ! Биир сомоҕо!» диэн ааттаах аһаҕас аан күнэ ыытылынна.

Оскуола 43 үөрэнээччилээх, манна Дьокуускайтан, Томпоттон, Өлөөнтөн, Чурапчыттан, Горнайтан тиийэ кэлэн интэрнээккэ олорон үөрэнэллэр. Кинилэри 43 үлэһит, ол иһигэр 20 учуутал, 6 иитээччи, түөрт эбийиэгинэн үөрэтэллэр. Учууталлар анал олигофренолог, логопед, дефектолог, психолог үөрэхтээхтэр. Сылын аайы араас үөрэхтэргэ, семинардарга үөрэнэллэр, таһымнарын үрдэтэллэр. Тыл өттүнэн хааччахтаах оҕолорго сайдалларыгар төһө кыалларынан усулуобуйа тэрийэллэр, анал туһуламмыт бырагырааманан үөрэтэллэр, олоххо бэлэмнээх буолан тахсалларын ситиһэллэр.

Тыараһа анал коррекционнай оскуолатын материальнай-коррекционнай базата саҥардыллыбыт. «Үөрэҕирии» национальнай барыл сүнньүнэн коррекционнай оскуолалар материальнай-техническэй базаларын бөҕөргөтөргө туһуламмыт бырайыак иитинэн оскуола-интэрнээтигэр оҕону сайыннарарга сэттэ кылааска оборудованиелар кэлэн үөрэххэ үгүс саҥа киирбит. Үлэ уруогун мастарыскыайдарын саҥардаллар, психолог, дефектолог, логопед кылаастарын аныгы үйэ ирдэбилигэр эппиэттиир гына оҥорбуттар. Маны сэргэ анал профильнай  биридимиэккэ: овощеводствоҕа, трактороведениеҕа, иискэ-ууска болҕомто ууруллар.

Ол курдук, логопед, ЛФК, психология, биология кэбиниэттэрэ, бэчээттииргэ, иистэнэргэ, уһанарга аналлаах сыаналаах аныгы тэрил кэлэн, иитиигэ-үөрэххэ толору туһана сылдьаллар. Ону таһынан коррекционнай оскуолаларга анаммыт «Доброшкола» бырайыак сүнньүнэн компьютернай кабинеттар, успуорт саалалара тупсарыллыбыттар.

Аһаҕас аан күн оскуола үөрэнээччилэрэ бэйэлэрэ иистэммит, уһаммыт малларын быыстапката турда. Сылын аайы ыытыллар өрөспүүбүлүкэтээҕи «Радуга Севера» күрэскэ ситиһиилээхтик кытталлар. Ону тэҥэ төрөппүт Елизавета Анатольевна Стручкова роза сибэккини кумааҕынан оҥорорго маастар кылаас ыытта. Оскуола учууталларын, үөрэнээччилэрин көмөлөрүнэн кэлбит ыалдьыттарга бэртээхэй кэнсиэр көрдөрдүлэр.

Елена Слепцова.