2023 сыллааҕы биир кэлим уонна сүрүн судаарыстыбаннай эксээмэннэр түмүктэрин дьүүллэһии уонна 2024 сылга былаанныыр мунньаҕы тохсунньу 19 күнүгэр улуустааҕы үөрэҕирии салалтатын начальнигын солбуйааччы Охлопкова Зинаида Петровна уонна сүрүннүүр испэсэлиистэр тэрийэн ыыппыттара.
Үөрэх дьылын саҕаланыыта эксээмэннэри тэрийии үлэтэ эрдэттэн барар. Таатта улууһугар биир кэлим эксээмэни тэрийии эппиэттээх уонна сүрүннүүр үлэһитэ Саина Ивановна Сергеева быйыл үлэ хайдах барбытын кэпсээтэ. 2024 сылга биир кэлим эксээмээни 172-11 кылааһы бүтэрээччи уонна судаарыстыбаннай эксээмэни 249-9 кылааһы бүтэрээччи бары ирдэбили тутуһан туттарда. Эрдэ эксээмэн туттарааччылар болдьох быһыытынан кулун тутар 22 — муус устар 22 күннэригэр, сүрүн түһүмэх ыам ыйын 23 от ыйын 1 күннэригэр буолан ааста. Онтон эбии туттарар түһүмэх балаҕан ыйын 4-23 күннэригэр ыытыллыаҕа.
Эксээмэн түмүгэр үрдүк бааллары Тааттатааҕы лиссиэй үѳрэнээччилэрэ Тарасенко Валерия нуучча тылыгар 81, обществознаниеҕа 88 уонна Сыромятникова Саина математика биридимиэтигэр 78 баалы ыллылар. Оҕолор, ордук уолаттар физика, биология, нуучча литературата, география, информатика уонна ИКТ биридимиэттэригэр үчүгэй бэлэмнээхтэрин көрдөрдүлэр. Уус Таатта оскуолатын үѳрэнээччитэ Никулина Арина омук тылыгар улуус үрдүнэн үрдүк баалы көрдөрдө. Эксээмэн түмүктэрин улуустааҕы үөрэх салаатын сайтыгар киирэн көрүөххэ сѳп.
Биир кэлим уонна судаарыстыбаннай эксээмэннэри туттарыыга үѳрэнээччилэри кытта ахсынньыттан үлэ барар. Боруобалаан туттарыы, ѳйтѳн суруйуу бу барыта оҕо долгуйбакка, этэҥҥэ туруктаах буолалларыгар туһуланар. Саҥа уларыйыынан 9 кылааһы бүтэрээччи судаарыстыбаннай эксээмэнин анал бланката суох тута компьютерга оҥордо. Онно оҕолор бэлэмнэр этэ, биллэн туран, биирдиилээн үѳрэнээччи сатаан туттарбата баар суол. Кинилэри кытта учууталлар эбии дьарыктанан күһүн этэҥҥэ туттаралларыгар бигэ эрэллээхпит.
Биир быйылгы уларыйыынан 11 кылааһы бүтэрээччи от ыйын 4-5 күннэригэр хаттаан туттаран, ылбыт баалын эбиэн сѳп. Хас да оҕо бэйэтин быраабын туһанна, онон икки үѳрэнээччи эбии үрүҥ көмүс мэтээли ылыаҕын сөп. Ол эксээмэннэр түмүктэрин от ыйын 17 күнүгэр күүтэбит.
Бары оскуолалар кыһамньылаах, хаачыстыбалаах үөрэҕи иҥэрбит ситиһиилэрэ: Кыһыл көмүс I истиэпэннээх мэтээл — Тарасенко Валерия Александровна (Тааттатааҕы лиссиэй);
Үрүң кѳмүс II истиэпэннээх мэтээл: Попова Диана Радимировна (Ытык Күѳл I нүөмэрдээх ОО), Жуллярова Анна Егоровна (Тааттатааҕы лиссиэй), Торговкина Марианна Анатольевна (Тааттатааҕы лиссиэй), Винокурова Айсулу Андреевна (Баайаҕа ОО), Павлова Диана Васильевна (Чычымах ОО), Хаптагаева Амгана Афанасьевна (Чычымах ОО).
Оҕолору, учууталлары уонна төрөппүттэрбитин ситиһиилэринэн истиҥник эҕэрдэлиибит, биир кэлим уонна судаарыстыбаннай эксээмэннэри тэрийсэн ыыппыт бары испэсэлиистэргэ, оскуолаларга махтанабыт. 2025 сыллаах үлэбит эмиэ маннык этэҥҥэ ааһарыгар баҕарыаҕыҥ!
Александра Прудецкая,
«Таатта» хаһыат общественнай көмөлөһөөччүтэ.