Бүгүн, ыам ыйын 15 күнэ Аан дойду үрдүнэн Дьиэ кэргэн күнэ. Судаарыстыба сүрүн баайа — дьоно-сэргэтэ, оттон кэхтибэт кэскилэ ыал буолар. Ханнык баҕар уопсастыба акылаата, тирэнэр тирэҕэ — дьиэ кэргэн.
Бу күн Таатта нэһилиэгин үбүлүөйдээх дьиэ кэргэннэри чиэстээһин буолан ааста. Манна өр сыл бииргэ олорбут, бигэ тирэхтээх, чөл олоҕу, үлэни өрө туппут 3 мааны ыал чиэстэннэ. Ол курдук Пелагея Николаевна, Николай Константинович Большаковтар, Мотрена Егоровна, Иван Иннокентьевич Слепцовтар ыал буолан олорбуттара 50 сыллара. Варвара Михайловна, Андрей Петрович Сергеевтар 55 сылларын уруу бэлиэ үөрүүлээх сиэрин – туомун ыытта Таатта улууһун государственнай аакталарын толорор управление салайааччыта Нария Пестрякова.
Бу ыаллары барыларын улуус «Бочуот кинигэтигэр”, ыал буолуу туоһу суругун, СӨ Ил Дарханын махтал суругун туттарда.
Үбүлүөйдээх дьиэ кэргэттэри «Таатта улууһа» МО баһылыга Айаал Бурцев эҕэрдэлээтэ, махтал суруктары туттарда. «Хас биирдии киһиэхэ дьиэ кэргэнэ — сүрүн баайа, олоҕун биһигэ, удьуорун утума-ситимэ. Биһиги эһигинэн киэн туттабыт уонна холобур оҥостобут», диэн бэйэтин санаатын эттэ.
Таатта нэһилиэгин баһылыга Егор Павлов үбүлүөйдээх ыаллары эҕэрдэлээтэ уонна махталын биллэрдэ.
Бигэ тирэхтээх, дьоллоох ыал буолуҥ! Дьиэҕит иһигэр өрүү ил-эйэ, таптал, дьол-соргу эрэ уйаланнын!
Елена Слепцова.