Баай Аҕа ууһугар дьоһун олоҕу олорон ааспыт төрөппүттэрин сырдык ааттарын үйэтитэн оҕолоро Арассыыйаҕа Дьиэ кэргэн сылынан бар дьонноругар сыаналаммат бэлэҕи оҥордулар.
Баайаҕа нэһилиэгин Дьоруой ийэтэ, тыыл, үлэ бэтэрээнэ Мария Петровна Слепцова төрөөбүтэ 90 сылыгар оҕолоро-сиэннэрэ «Дьол туоната» диэн кинигэни бэчээттэтэн таһааран, төрөөбүт-үөскээбит тэлгэһэлэригэр чугас аймах-билэ дьоннорун түмэн биһирэм ыыттылар. Кинигэ 12 оҕолоох Дедюкиннар дьиэ кэргэн иллээх, дьоллоох олохторун сэһэргиир, умнуллубат үтүө түгэннэрин кэпсиир, ийэ, аҕа дьоһун аатын үйэтитэр, киэҥ аймах төрүччүтүн билиһиннэрэр. Аҕа дойду Улуу сэриитин уотун ааспыт фронтовик Семен Ефремович, эдэркээн Мария Петровна тапталларын уйалаан, төрөөбүт дойдуларыгар олохсуйбуттара, эйэлээх олоҕу түстээн, нэһилиэк тэрилтэлэригэр үтүө суобастаахтык үлэлээбиттэрэ. Мария Петровна айылҕаттан дьоҕурдаах хоһоонньут, нэһилиэк иһинээҕи «Көмүлүөк күлүмэ» литературнай түмсүү кыттыылааҕа этэ. Кини куоратынан-тыанан үгүс тэрээһиннэргэ үөрэ-көтө кыттан, истиҥ иэйиилээх лирическэй хоһооннорун өйтөн ааҕарын дьон-сэргэ биһирээн истэрэ. Түмсүү көхтөөх кыттааччыта бэчээккэ, телевидениеҕэ тахсан түмсүүбүтүн киэҥ эйгэҕэ билиһиннэрбитэ. Хомоҕой тыллаах хоһоонноро «Көмүлүөк күлүмүн суһумар», «Кыайыынан кынаттаммыт олохпут» хомуурунньуктарынан тахсыбыттара. Кинигэ биһирэмэ олус иһирэх тыыннаах истиҥ эйгэҕэ үрдүк таһымнаахтык ыытылынна . Сүргэни көтөҕөр тэрээһиҥҥэ «Ийэҕэ махтал» кэрэ үҥкүү, Мария Петровна хоһоонноругар талааннаах музыкант идэлээх сиэннэрэ, аймах ыччаттара айбыт истиҥ ырыалара мустубут дьону долгутта.
Оҕолоро, сиэннэрэ тапталлаах дьонноругар анаммыт «Дьол туоната» кинигэ ис хоһоонун сонуннук арыйан билиһиннэрдилэр, биир дойдулаахтарын үйэтитэн ахтыы суруйбут уонна аймах, дьүөгэ дьоҥҥо кинигэ бэлэх ууннулар.
Иэйии
М.П.Слепцова.
Айылҕам кэрэтин сөҕөммүн
Аргыыйдык туойуохпун баҕардым,
Көҕөрөр урсуну сөҕөммүн
Көҥүл тыл сүмэтин көрдөөтүм.
Сиккиэр тыал симиктик сипсийэн
Сүрэҕим битиитин уоскутар,
Сибэкки дьөрбөтүн наардааммын
Сиэнчээним кыысчааҥҥа туттардым.
Куула тыа күөх дуолга сууланан
Холкутук нуурайар-нусхайар,
Хатыҥнар чараҥҥа лаглаһан
Хаамардыы далбаатаан ылаллар.
Күндэлэс сүүрүктээх үрэхпэр
Күн түһэн күлүгүн көрүнэр,
Будьурхай баттахтаах үөт мастар
Көҥүскэ дьирбинньик тэбэллэр.
Александра Кустурова.