«Азия оҕолоро» спортивнай оонньууларын арыллыыта
VIII-с норуоттар икки ардыла-рынааҕы «Азия оҕолоро» спортивнай оонньуулар арыллыытын бүттүүн аан дойду кэтээн көрбүт буолуохтаах.
Быйылгы күрэхтэһии кыттааччытын ахсаанынан инники Оонньуулары куоһарда: 24 дойдуттан (Россия, Беларусь, Казахстан, Таджикистан, Сирия, Палестина, Монголия, Узбекистан, Китай, Хоту уонна Соҕуруу Корея, Индия, Иран, Грузия, Азербайджан, Армения, Бангладеш, Бахрейн, Кыргызстан, Таиланд, Лаос, Ливан) 3000-н тахса эдэр спортсмены түмтэ.
Быйыл Россияҕа оҕо сылынан, аан дойдуга буола турар быһыы-майгы кэмигэр ыытылла турар күрэхтэһии суолтата дириҥ. Тэрээһин аһыллыытыгар Россия спордун миниистирэ Михаил Дегтярев эттэ: «Ваши традиционные соревнования всегда проходят на высоком уровне, вносят значимый вклад в развитие детско-юношеского спорта, популяризацию идей олимпийского движения, укрепление дружбы между народами разных стран. В нынешнем году Игры «Дети Азии» радушно встречает Якутск, который по праву славится солидным опытом проведения таких престижных соревнований. И, конечно, ребята смогут хорошо отдохнуть, познакомиться с достопримечательностями и уникальной природой дальневосточного региона. Уверен, что Игры станут большим, праздничным событием для спортсменов, гостей и жителей Якутска».
«Азия оҕолоро» спортивнай оонньуулар аһыллыытын ис хоһооно Саха норуотун төрүт олоҕун, айылҕатын, үгэстэрин аныгы оҕолорго тиийимтиэ буолар гына толкуйтан сиэдэрэйдик көрдөрүлүннэ.
Дьүһүйүүгэ «Азия оҕолоро» күрэх-тэһиини аан бастакынан тэрийбит Саха Өрөспүүбүлүкэтин бастакы Президенэ Михаил Ефимович Николаев сырдык аата дорҕоонноохтук ааттаммыта Саха сирин дьонун барыбытын үөртэ.
VIII «Азия оҕолоро» спортивнай оонньуулар былаахтарын уонна уотун киэн туттар спортсменнарбыт Георгий Балакшин, урукку Оонньуулар чулуулара тутан киирдилэр.
Спорт бырааһынньыга дьоһуннук саҕаланна.
«Азия оҕолоро» күрэхтэһиини кимнээх сырдаталларый?
Бу күрэхтэһиигэ күөн көрсөр эдэр спортсменнары, кинилэр ситиһиилэрин, төрөөбүт дойдуларын аатын күөрэччи тутарга киирсэр оҕолору Азербайджан, Беларусь, Казахстан, Кыргызстан, Пакистан, Сирия, Узбекистан уонна биллэр российскай информационнай агентстволар ТАСС, РИА, телеканал МАТЧ ТВ усталлар, суруйаллар, үйэтитэллэр.
Күн аайы «Дети Азии» сурунаал, дневник тахсар.
Маны таһынан «Саха» НКИХ канаалыгар, социальнай ситимнэргэ, улусмедиа порталга, улуустар хаһыаттарын телеграм канаалларыгар көрүөххэ, ааҕыахха сөп.
Анал идэтийбит фотографтар күрэхтэ-һии түгэннэрин спорт историятыгар хааллараллар.
Күн-дьыл үтүө сонуннары сууйбат
2004 сыллаахха «Азия оҕолоро» норуоттар икки ардыларынааҕы улахан түһүлгэҕэ Тааттаттан тустууга күрэхтэһэр Гоша Ноенохову долгуйа кэтээбиппит, улахан ситиһиилэммитигэр тэҥҥэ дьолломмуппут. Билигин Егор Егорович, Илларион Федосеев аатынан оҕо спортивнай оскуолатын директора, бастакы тренерэ Олег Лукич Үчүгээйэп уонна Степан Петрович Сивцев эрчийиилэринэн дойдутун доргуччу ааттаппыт уолбут ол кэм туһунан сэһэргиирин сэҥээриэҕиҥ: «4 сылга биирдэ ыытыллар оонньуулар диэн бэйэтэ оҕолорго Олимпиада кэриэтэ улахан күрэс буоллаҕа, элбэх бэлэми ааһаҥҥын Саха сирин сүүмэрдэммит хамаандатыгар киирэҕин. Мин ыйааһыммар республикаҕа 4-5 тэҥ уолаттар этибит, перекидка бөҕөтө оҥорбуттара, ону барытын ааһаммын, республика сборнайыгар 2-с нүөмэринэн киирэммин, Саха сирин медальнай копилкатыгар бронзаны аҕалбытым, 3 миэстэ иһин бастакы нүөмэринэн киирбит Верховской Сашаны ыраастык ууран кыайбытым. 20 сыл анараа өттүгэр 2004 сыллаахха көҥүл тустууга Саха сирин сборнайа билигин кэлэн эргиллэн көрдөхпүнэ, золотой состав эбит диэтэхпинэ сыыспатым буолуо. Кыра ыйааһынтан саамай улахан ыйааһыҥҥа диэри барыны барытын кыайа сылдьыбыт, сылдьар уолаттардаахпыт. Виктор Лебедев, Владислав Андреев, Тимур Пестеров, Иннокентий Иннокентьев, Михаил Пахомов, Владимир Карпенко, Увар Тимофеев, Айаал Лазарев ити курдук спортка улахан ситиһиилэри ситиспит, үлэҕэ-хамнаска да билигин улахан дуоһунаска үлэлии сылдьаллар. Тустууктар үйэ тухары, эбиитин биир көлүөнэ уолаттар куруутун тутуһа, кэпсэтиһэ сылдьабыт, нууччалыы эттэххэ, борцовское братство диэн баар. Ханнык да түгэҥҥэ бииргэбит».
«Азия оҕолоро» бас күүһэ сомоҕолоһууга, доҕордуу буоларга чиҥ күрбэ. Бу да иһин инники эйэлээх олоҕу түстээн, үйэлээх бэлэҕи норуотугар, бар дьоҥҥо хаалларбыт эбит биһиги Саарыммыт Михаил Ефимович Николаев! Оттон быйыл кини үтүө дьыалатын салҕаан Ил Дархаммыт Айсен Сергеевич Николаев сүҥкэн үлэни ыытарын көрө-билэ сылдьабыт. Дьокуускай куорат тыһыынчанан араас омук оҕолорун, эппиэттээх үлэһиттэрин мунньан, Ил, Эйэ түһүлгэтэ буолан, киэркэйэр, Аан дойдуга доҕордуу буолуохха, Эйэни эрэ өрө тутуохха, Кэнчээри ыччаттарбыт дьоллоох-соргулаах олоххо олордуннар диэн аһаҕастык көрдөрөр.
Анна Посельская.
Хаартыска «Азия оҕолоро» оонньуу дирекциятыттан