Дьоһун дьонноох Дьүлэйдэр

Василий Шестаков:

«Саха өрөспүүбүлүкэтин тыа хаһаайыстыбатыгар министиэристибэтэ сири  оҥорууга ылсара, тугу эмит толкуйдуура буоллар…»

«Аҕа – дьиэ кэргэн туллар тутааҕа, эрэнэр тирэҕэ» диэн өйдөбүл бүгүн сырдатар дьоруойбар Дьүлэй нэһилиэгэр 1982  сылтан ыал буолан, оҕо-уруу тэнитэн олорор төрүт олохтоох  Саха өрөспүүбүлүкэтин тыатын хаһаайыстыбатын туйгуна,  1983  сылтан саҕалаан  оройуоҥҥа  6 төгүллээх социалистическай күрэхтэһии кыайыылааҕа, «Беларусь» МТЗ трактордарга чемпион-тракторист,  1984 сылга оройуоҥҥа сахалартан бастакы хапытаан А.Д. Богатырев аатынан бириэмийэ лауреата,  ССРС Норуотун Хаһаайыстыбаларын Үрдүкү Ситиһиилэрин (ВДНХ)  сүрүн кэмитиэтин боруонса мэтээлин хаһаайына, 12-с пятилетка Ударнига, ЫБСЛКС  Киин кэмитиэтин «Золотой колос», «Мастер – Золотые руки», «Мастер- умелец» бэлиэлэрин хаһаайыннара, механизатор  Шестаков Василий Владимировичка толору сыһыаннаах.

Василий Владимирович сүрдээх сэмэй, туруу үлэһит киһи. Кини сахалыы мындыр, ийэ өйүнэн салайтаран, 1982 сыллаахтан ыал буолан унаар буруону унаарытаат ынах сүөһүнү ииттибитэ. Бастаан 2 сүөһүлээхтэрэ. Оччолорго чааһынай бас билиигэ сир суоҕа, совхозка оттоон бырыһыаҥҥа от ылаллара.

Билигин ахсаан өттүнэн добуччу  ынах сүөһүнү тутан олорор аҕа баһылык. Оҕолорун, сиэннэрин саха ыалын сиэринэн  куоратынан, тыанан иитэн- аһатан олорор.

Тэлгэһэлэригэр киирээт, түс-бас, дьоһун олохтоох ыалга кэллим диэн сананаҕын. Ол курдук, барыта уурбут-туппут курдук орун оннугар оҥоһуллубут тутуулар, олбуор саҥардыллыбыт, эбии саҥа терраса туттубуттар, олбуор киэҥник хаара күрдьүллэн, тэлгэһэ  киэҥник-куоҥнук ып-ыраастык нэлэһийэр, туспа улахан техника киирэр гарааһа, сүөһү-ас кыстыыр хотоно.

Василий  кэргэнинээн Ирина Константиновналыын  түөрт кыыс  оҕолоох ыал. Улахан кыыстара Анжела икки үрдүк үөрэхтээх, кэргэнэ Николай чааһынай тутуу тэрилтэлээх, икки оҕолоохтор. Иккис кыыс Олимпиада быраас идэтинэн Дьокуускай куоракка перинатальнай кииҥҥэ үлэлиир, күтүөт Артур пенсионнай фондаҕа специалиһынан үлэлиир, икки оҕолоохтор. Үһүс оҕолоро Ирина дьиэ хаһаайката, икки оҕолоох. Кыра кыыс  дуобакка норуоттар икки ардыларынааҕы  гроссмейстер, кинини, Шестакова Натальяны, Саха сиригэр билбэт, кини ситиһиилэринэн киэн туттубатах, билбэт киһи ахсааннаах буолуо. Наталья кыра эрдэҕиттэн мындыр өйдөөх, бэйэтин бириэмэтигэр Москваҕа Тимирязев аатынан  университекка үөрэнэргэ ыҥырыллыбыт рационализатор-механизатор, дьоруой аҕа Петр Иванович  Захаровка дуобакка  дьарыктаммыта. Онон ситиһии түөлбэттэн, кырдьаҕастар мындыр өйдөрүттэн, толкуйдуур дьоҕурдарыттан сэмсэлэммититтэн кэллэҕэ диибит, ол оруннаах.

Василий Шестаков Дьүлэй нэһилиэгэр оттуур сирэ 25 гаа, эбии түүлэһэн, эккэ мэнэйдэһэн оттуур уонна Амма өрүс кытылыгар Дьүлэй нэһилиэгэ 200 кэриҥэ  гаа сириттэн 25 гааны өлүүлэнэн оттуур. Ол отун тиэйэн аҕалыыта, техникатын илдьэрэ-аҕалара сыанан аҕаабат үлэ. Ол да иһин Дьүлэйтэн Амма эҥэр оттуур дьон ахсаана сыл аайы эриэ дэхси буолбат. Арай сылын аайы Шестаков Василий хара күһүҥҥэ диэри оттуу сылдьара иһиллээччи. Ити эмиэ дьаныардаах үлэһит киһи көстүүтэ диэн сыаналыыбын. Василий Владимировичтыын кэпсэтиигэ сир боппуруоһугар ыйытыы биэрбиккэ ол сир талаҕынан, дулҕанан  үүммүтүн, онон нэлэһитэн оттуур сиринэн туһаныы кыаллыбатын, бар туома эрэ оттонорун, онон тыа хаһаайыстыбатын управлениета, Саха өрөспүүбүлүкэтин тыа хаһаайыстыбатыгар министиэристибэтэ сири  оҥорууга ылсара, тугу эмит толкуйдуура буоллар диэн баҕа санаатын үллэһиннэ.Оччоҕуна улуус да дьоно, атын кураайы да улуустар оттоон абыраныахтар этэ диэн Василий Владимирович толкуйун тиэртэ.

Техника өттүнэн бэйэлэрин кыахтарынан сөбүгэр дьаһанан олороллор. Бастакы техникаларын «Туймаада –Лизинг» нөҥүө биэс сыллаах кредиккэ киирэн булуммуттар, онтон кэлин сыыйа үлэлээн-хамсаан, тэринэн испиттэр.

От таһыытыгар, үүтү тиэйиигэ, оттуу барарга, солярканан субсидиянан туһаммыппыт улахан көмө буолар диэн хаһаайын кэпсиир.

Ханна да баар көстүүнү —  сүөһүнү иитиигэ кырдьаҕастар оруоллаахтарын — туһунан кэпсэттибит. Билигин Василий Владимирович бэлиэтииринэн, ыччаттар урукку курдук сүөһү иитиитинэн маассабайдык дьарыктамматтар, ол эрэн олох дьарыктамматтар диир табыллыбат.

Саха өрөспүүбүлүкэтин бырабыыталыстыбата ынах сүөһү төбөтүгэр 35-тии тыһыынча көрөр буолбута – бу улахан көмө диэн хаһаайын этэр, өссө ити көмө сууммата элбиирэ эбитэ буоллар дьон сүөһүтүн эһиитэ аччыа эбитэ буолуо диэн санаатын үллэстэр.

Ити курдук, Василий, Ирина Шестаковтар «оҕолорбутун аһатаары сүөһү ииттэбит . Билигин ыччаттар маҕаһыын аһыгар олус оҕуннулар, астара-үөллэрэ атын буолла, ону иҥэмтэлээх төрүт аспытынан хааччыйаары, ыччаттарбыт доруобуйаларын тупсараары, төрүт астан тэйитимээри сүөһү ас ииттэбит, ынах сүөһү тутабыт»  диэн санааларын үллэһиннилэр.

Дьэ маннык тэринэн олоруу 540 нэһилиэнньэлээх Дьүлэй нэһилиэгэр 130-ча хаһаайыстыба төбөтүн аайы кэриэтэ көстүү, онон бу нэһилиэккэ тыа ыала чиҥ туруктаах, төрүт сиртэн тэйбэтэх, сир сүмэһинин иҥэринэр, сиргэ сахалыы сэмэйдик харысхаллаахтык сыһыаннаһар диэн өйдөбүллээх араҕыстым.

Анна Посельская.