Бэс ыйын 23 күнүгэр Туймаада хочотугар Владимировка бөһүөлэк таһыгар ытык Таатта дьоно-сэргэтэ “Таптал. Итэҕэл. Эрэл.” сылыгар аналлаах ыһыах ыстылар. Ыһыахха Дьокуускай куоракка олорор биир дойдулаахтарбытын сэргэ улуус дьаһалтатын, улуустааҕы норуот айымньытын дьиэтин, спорткомитет үлэһиттэрэ, нэһилиэк баһылыктара, ансаамбыллар, ол иһигэр “Доҕордоһуу” оҕо үҥкүү ансаамбыла кэлэн кыттыыны ыллылар. Ыһыах нэһилиэктэр түмсүүлэрэ баһылыктарын уонна түмсүүлэрин салайааччыларын иннилэригэр уктан сэлэлээн хаамыыларыттан саҕаланна. Виталий Очиров сэттэ кыталык кыыс, тоҕус туруйа уол арыалдьыттаах түһүлгэҕэ киирэн ыһыах алгыһын түһэрдэ, кинини сэргэ Валентин Козлов сиэри-туому ыытыыны сүрүннэстэ. Алгыс кэнниттэн Алексей Аржаков уонна Альбина Семенова таатталардыы таттаран, улахан түһүлгэлээх оһуохайы тэрийдилэр.
Ол кэнниттэн баһылык Айаал Бурцев, түмсүү салайааччыта Владимир Аржаков тыл эттилэр, наҕараада туттардылар. Таатта талааннаахтара бэрт сэргэх концеры көрдөрдүлэр. Сахалыы многоборьеҕа: хапсаҕайга, мас тардыһыытыгар, атах оонньуутугар Ытык Күөлтэн Алексей Ефимов бастакы, Чөркөөхтөн Албан Аввакумов иккис, Дэбдиргэттэн Егор Иовлев үһүс буоллулар. Дьон болҕомтотун тардыбыт бэрт сэргэх күрэхтэһиигэ — мырааҥҥа сүүрэн тахсыыга Егор Иовлев бастаата. Эбиэттэн киэһээ Дьокуускайга олорор биир дойдулаахтарбыт ырыаны-тойугу көҕүлүттэн туттулар. Сүүс саастаах ытык кырдьаҕаспыт, улуу сэрии бэтэрээнэ Наум Трифонович Слепцов ыһыахха ыалдьыттаата, ыччаттарга анаан баҕа санаатын, алгыһын эттэ. Ыһыаҕы Таатта түмсүү (сал. В.В.Аржаков), Таатта улууһун администрацията (баһылык А.С.Бурцев) көҕүлээһиннэринэн түмсүү уонна улуус комиссиялара тэрийэн ыыттылар. Тэрийэр комиссия бары чилиэннэригэр, күүс-көмө буолбут урбаанньыттарбытыгар, улуус администрациятын үлэһиттэригэр, нэһилиэк баһылыктарыгар, түмсүүлэрин салайааччыларыгар маннык элбэх киһи кыттыылаах наһаа үчүгэй ыһыаҕы тэрийэн ыыппыттарыгар махтанабыт. Таатталар улуу Туймаада хочотугар бу курдук ийэ ууларыттан хамсаан ыһыахтыы иликтэр диэтэхпинэ, арааһа сыыспатым буолуо. Ол курдук бу ыһыахха 400-тэн тахса киһи кытынна. Түмсүү салайааччыта Владимир Владимирович уонна улууспут аҕа баһылыга Айаал Семенович сүбэлэрин холбоон Дьокуускай куоракка олорор биир дойдулаахтарбытын уонна улууска олорор Таатталары Туймаада хочотугар түмтүлэр. Дьокуускай куоракка олорор Таатталар куорат уонна республика ыытар тэрээһиннэригэр, ол иһигэр быыбардарга активнайдык кыттабыт. Республикаҕа общественнай-политическай тэрээһиннэр буолаары гыннахтарына республика салалтата, улуустара Таатта түмсүүтэ, дьоно-сэргэтэ туох толкуйдаахтара буолла диэн ыйыталлар, интэриэһиргииллэр. Бу биллэн турар Таатталар бөлөһүөктүү толкуйдаахтарынан, буолар тэрээһиннэргэ дьоннорун-сэргэлэрин түмэн республикабыт, дойдубут туһугар сөптөөх үлэни ыытарбыт түмүгэ буолар. Улууспут аҕа баһылыга Айаал Семенович баһылык буолуоҕуттан уопуттаах нэһилиэк баһылыктарын сүбэлэринэн дьонун-сэргэтин түмүүгэ сөптөөх хардыылары оҥорон эрэр. Олортон биир ой-ботуо холобуру аҕалар буоллахха, дойдубут президенин быыбарыгар республикаҕа дьону быыбарга кытыннарыы уонна В.В.Путин элбэх бырыһыаны биэрии түмүгүнэн улууспут республикаҕа бастакы миэстэни ылбыта буолар. Дойдубутугар уустук балаһыанньа кэмигэр ытык Таатта дьоно-сэргэтэ дойдубут президенигэр толору итэҕэлин биллэрдэ. Бу түмүк эмискэ халлаантан түһэн кэлбэт, элбэх бириэмэни, толкуйу эрэйэр сыралаах тэрийэр үлэ түмүгэ буоларын билэбит уонна астынабыт. Ыһыахха улуус дьоно биир санааҕа түмүллүбүтэ эһиил улууспутугар буолуохтаах Манчаары Оонньуутун үрдүк таһымнаахтык тэрийэн ыытыыга олук буолуоҕа. Убайбыт Мандар Уус этэринии “Түмсүү — төлкө төрдө”.
Неустроев Иван Гаврильевич, Дьокуускай куораттааҕы Дьүлэй нэһилиэгин түмсүүтүн, республика улуустарын землячестволарын сэбиэтэ общественнай тэрилтэ салайааччыта.