Таатта улууһун Уус Тааттатыгар анал байыаннай дьайыыга сылдьан, олоҕун былдьаппыт Николай Неустроев сырдык аатыгар сүгүрүйэр тэрээһиннэр буоллулар. Ол курдук, оскуола уолаттарыгар үс күннээх байыаннай сбор ыытылынна, ону тэҥэ Николай Неустроев аатынан Дьоруой паартата, кини туһунан стендэ баар буолла.
Сүгүрүйүү күнүгэр эдэркээн Николай Неустроев төрөппүттэрэ Ксения Дмитриевна, Николай Васильевич Неустроевтар, Коля бииргэ үөрэммит оҕолоро, аймах дьоно, учууталлара, оскуола үөрэнээччилэрэ кытыннылар. Николай Неустроев Уус Таатта орто оскуолатын 2011 с. бүтэрэн, орто үөрэҕи түмүктээн, армияҕа сулууспалаан, үлэлии сылдьан, 2022 сыл күһүнүгэр мобилизациялан, анал байыаннай дьайыыга барбыт. Учууталлара Коляны бастыҥ спортсмен, ырыаһыт, үҥкүүһүт быһыытынан өйдүүллэр, кини холку майгытын, ыгылыйбат, өрөһөлөспөт бэйэтин, арай «мүчүк» гынан мичээрдээн кэбиһэрин кэпсииллэр.
Үөрэммит оскуолатын учууталлара иилээн-саҕалаан ыыппыт тэрээһиннэригэр сбор кыттыылаахтара байыаннайдыы хааман, сэргэхситтилэр, ийэтин, учууталларын этиилэриттэн, бүтэһик күннэригэр диэри бииргэ сылдьыбыт доҕорун видеокэпсээниттэн мустубут дьон долгуйан, харахтарын уутун кыамматылар. Ийэ дойдуну көмүскүүр өйү-санааны өрө тутан, дьоруойдуу охтубут Николай Неустроев сырдык аатын өйдүү-саныы, киэн тутта ааттыы сылдьарга оскуола кэскилэ тылын биэрдэ, эрэннэрдэ.
Жанна Бурмистрова.