Төһө да кыыдааннаах кыһыммыт томороон тымныынан бүрүллэн турдар, Дэбдиргэ бөһүөлэгин дуобаты таптааччыларыгар дьоһун күн үүннэ. Ол курдук, нэһилиэк бэтэрээн дуобаччыта, Сэмэн Көстөкүүнэбис Марков бэйэтэ турунан, сүүрэн-көтөн 65 үбүлүөйдээх сылынан нэһилиэк дуобаты сэҥээрээччилэригэр анаан аһаҕас турнир тэрийдэ. Санатар буоллахха, дуобат- спорт көрүҥүн Сэмэн Көстөкүүнэбис күүскэ пропагандалааччылартан биирдэстэрэ. Биэс сыл аннараа өттүгэр 60 сааһын туолар үбүлүөйдээх сылыгар Игидэй нэһилиэгин В.П.Андросов аатынан КСК-н дьиэтигэр улуустааҕы дуобат федерациятын түмэн, улууска дуобаты сэргээччилэри мунньан олус үчүгэй, улахан бириистээх, элбэх кыттааччылаах, үрдүк таһымнаах дуобат турнирын тэрийэн, дьонун-сэргэтин улаханнык сэргэхсиппитэ. Эдэр көлүөнэҕэ дуобаты киэҥник пропагандалаабыта.
Быйыл нэһилиэк иһинэн ыытыллар дуобат турнирыгар оҕотуттан саҕалаан, кырдьаҕаһыгар тиийэ түмүстүлэр. Тэрээһин үөрүүлээх чааһын А.Ф.Бояров аатынан НАДь культураҕа үлэһитэ, Ермолаева Мария Иннокентьевна бэрт сэргэхтик аста. Сэмэн Көстөкүүнэбис бэйэтэ сөбүлээн дьарыгырар «Көмүс күһүн» үҥкүүтүн ансамбыла, сал. Унарова Раиса Ивановна олус үчүгэй үҥкүүнэн эҕэрдэ нүөмэр туруоран күрэхтэһии кыттыылаахтарын сэҥээриитин ыллылар. Ыытааччы, үбүлээр олҕун кэрдиис кэмнэрин саас сааһынан сааһылаан дуобаты пропагандалааччы быһыытынан, кэлэр кэнчээри ыччакка итэҕэтиилээхтик тиэртэ.
Ол курдук, Сэмэн Көстөкүүнэбис дуобакка бастакы разряды 90-с сылларга Рига курдук ыраах куоракка тиийэн толорбутун кэскиллээх ыччат сөҕө-махтайа иһиттэ. Тэрээһини нэһилиэк администрацията, баһылыгы солбуйааччы Дьяконова Вероника Ивановна, В.П.Андросов аатынан КСК, сал.Эргичимин Родион Елеганович, Бэтэрээн сэбиэтэ салайааччы Аргунова Анна Константиновна уонна үбүлүөйдээх , Марков Семен Константинович сүбэлэрин холбоон элбэх спонсоры кэпсэтэн, олус үчүгэй бириистэри туруоран кэлбит дьон астыныытын-дуоһуйуутун, хайҕалын-махталын ылан, үрдүк таһымҥа тэрийдилэр.
Ол курдук сүрүн спонсордарынан буоллулар: Кыайыылаах кубогын, мэтээлин Сэмэн Көстөкүүнэбис дьиэ кэргэнэ (оҕолоро) туруордулар, Игидэй нэһилиэгин администрацията, В.П.Андросов аатынан КСК, А.Ф.Бояров аатынан НАДь, Э.К.Пекарскай аатынан орто оскуола коллектива, «Көмүс күһүн» үҥкүү ансамбыла, «Аартык» түөлбэ олохтоохторо, ИП Аргунова Л.Ф., ИП Петров С.Г., маны таһынан Сэмэн Көстөкүүнэбис бииргэ үөрэммит үөлээннээхтэрэ, аймахтара, чугас дьоно. Эҕэрдэ тылы уонна сэмэй бэлэҕи туттардылар нэһилиэк депутаттарын, администрациятын аатыттан-аҕа баһылык, Марков Егор Алексеевич, бэтэрээн сэбиэтин бэрэсэдээтэлэ — Аргунова Анна Константиновна, бииргэ үөрэммит үөлээннээхтэрин аатыттан, Пахомова София Семёновна, олохтоох «Аартык» түөлбэтин салайааччыта Габышева Александра Васильевна, «Көмүс күһүн» үҥкүү ансамбылын салайааччыта, Унарова Раиса Ивановна, ыкса ыала, күүстээх дуобаччыт — Кузьмина Раиса Николаевна, балта-Ефимова Варвара Константиновна. Туора Күөлтэн Сэмэн Көстөкүүнэбис орто кыыһа,Александра Семёновна Гуляева сиэннэрин илдьэ кэлэн кыттыыны ылбыта тэрээһини сэргэхситтэ. Күрэхтэһии хаамыытын билиһиннэрдэ, судьуйалаата — нэһилиэк бастыҥ дуобаччыта: Захаров Пантелеймон Романович. Дуобат күрэҕэр Игидэй нэһилиэгиттэн 25 оонньооччу кыттыыны ылла, 12 дьахтар, 5 эр киһи, 8 оҕо. Сүрдээх интэриэһинэй, эрийсиилээх, эмиэ да тыҥааһыннаах күрэхтэһии кэнниттэн түмүк маннык таҕыста:
13-р диэри саастаах оҕолорго: 1 м. Максимов Саша-5 кл, 2 м. Варварикова Айыына — 4 кл. 3м. Егорова Люба — 7 кл. 4м. Иовлев Лонгин — 5 кл.
14-17 саастаах оҕолорго 1 м. Ордахова Виолетта, 2 м. Ермолаев Айсаар — 10 кл. 3 м. Турнина Нарияна — 10 кл. Дьахталларга. 1 м. Кузьмина Раиса Николаевна, маҥнайгы разрядтаах. 2 м. Окоёмова Анна Михайловна, маҥнайгы разрядтаах. 3 м. Аргунова Любовь Филипповна, дуобаты көҕүлээччи, активист. 4. м.Ордахова Валентина Прокопьевна — нэһилиэк администрациятын специалиһа.
Эр дьоҥҥо: 1 м. Аргунов Пётр Пётрович — бэтэрээн дуобатчыт. 2 м. Бойтунов Константин Константинович-«Мээндийэ» түөлбэ олохтооҕо. 3 м. Ефимов Егор Алексеевич-«Аартык» түөлбэ олохтооҕо. 4 м. Эргичимин Родион Елеганович — КСК салайааччыта.
Муҥутуур кыайыылааҕы быһаарыыга мүнүүтэҕэ оонньоотулар. «Муҥутуур кыайыылаах үрдүк аатын ылла — Ордахова Виолетта Игидэй орто оскуолатын 10 кылааһын үөрэнээччитэ. «Бэтэрээн оонньооччу» үрдүк аатын ылла — Аргунова Анна Көстөкүүнэбинэ. «Кэскиллээх оонньооччу» үрдүк аатын сүктэ — Варварикова Айыына — Игидэй орто оскуолатын 4 кылааһын үөрэнээччитэ. Бу курдук үөрэн-көтөн күрэхтэһиибитин түмүктээн, үбүлээрбит бэлэҕин тутан, үбүлээрбитин эҕэрдэлээн, өттүк харалаах, илии тутуурдаах Игидэй нэһилиэгин дуобаты таптааччылара дьиэбитигэр тарҕастыбыт.
Бэлиэтиэхпин баҕарабын дьиэ кэргэнинэн дуобаты сэҥээрээччилэр бааллара олус үчүгэй эбит. Ол курдук, бүгүҥҥү күрэҕи Аргунов П.П. дьиэ кэргэнэ, Ордаховтар дьиэ кэргэн олус киэргэттилэр. Варвара Ефимова-дуобат күрэҕэр бастакы кыттааччы.