Үөрэх кыһата — нэһилиэк инники сайдыытын түстүүр, кэлэр көлүөнэни үүннэрэр тутаах тэрилтэнэн буолар.
Биир үйэ кэриҥэ үгүс көлүөнэни уһуйан таһаарбыт, үтүө үгэстэри, саҥа саҕалааһыннары олоххо киллэрбит, киэҥ иитэр-үөрэтэр эйгэлээх И.Н. Гуляев аатынан Туора Күөл орто оскуолата ураты суоллаах-иистээх уһуйааччыларынан, бастыҥ үөрүйэхтээх учууталларынан биллэр.
Төрүт өбүгэ саҕаттан баай устуоруйатынан уос номоҕор киирбит, үлэни өрө туппут үтүөкэн дьонунан, айылҕаттан бэриллибит талааннаахтарынан киэҥник биллэр Дьүлэй нэһилиэгэр эдэр испэсэлиистэр айа-тута үлэлии кэлэллэрэ хайҕаллаах суол.
Быйылгы үөрэх дьылыгар Дьүлэй нэһилиэгэр история, обществознание биридимиэтигэр Чурапчы улууһуттан Владислав Николаевич Владимиров уонна ыаллыы сытар Игидэй нэһилиэгиттэн физика учууталынан Николай Эдуардович Марков үлэлии кэлбиттэрэ. Үөрэхтэрин бүтэрбит анал испэсэлиистэри нэһилиэк дьаһалтата, оскуола салалтата саҥа, сылаас, толору хааччыллыылаах уопсай дьиэнэн хааччыйбыттара.
Эдэр учууталлар олорор, үлэлиир усулуобуйалара тэриллэн, таас оскуолаҕа үлэлэрин саҕалаан, уһуйааччыларыттан, кэллиэгэлэриттэн үгүс үөрүйэхтэри ылыныахтара, бастыҥ сатабыллары баһылыахтара.
Мария Павлова.