Игидэйгэ өссө биир сэргэх, дьоһун тэрээһин буолан ааста. Ол курдук , 1979 с. оскуоланы бүтэрбит выпусктар тутуспутунан түмсэн кэлэн төрөөбүт нэһилиэктэригэр, үөрэммит оскуолаларыгар тэрээһин ыыттылар.
Үөрэммит оскуолаларыгар үөрэппит учууталлара Скрябина Капиталина Григорьевна Хаҥалас улууһун Покровскай куоратыттан кэлэн, саха тылын предметигэр 5-с кылаастарга КВЕСТ оонньуу ыытта.
Барыта үс хамаанда оонньууга сүрдээх көхтөөхтүк кытыннылар.
Икки хамаанда 5-с кылаастартан, биир хамаанда 1979 сыллаахха оскуоланы бүтэрбиттэртэн турда.
Оҕолор тыл оонньуутугар оонньоон астыннылар, сүргэлэрэ көтөҕүлүннэ.
Онтон бука бары иккис этээскэ үөрүүлээх линейкаҕа кыттыыны ыллыбыт. Выпусктар уонна учууталлара оҕолорго туһаайар этиилэрин иһиттибит. Үөрэммит оскуолаларыгар бэлэхтээх-туһахтаах кэлбиттэр.
Салгыы А.Ф.Бояров аатынан норуот айымньытын дьиэтигэр нэһилиэнньэҕэ анаан выпусктар таһаарбыт кинигэлэрин сүрэхтэниитэ буолла.
3 чаастан бииргэ үөрэммит хомусчут доҕордорун Николай Филиппович Унаров аатыгар «Дьүрүһүй хомуһум» хомус күрэһин үрдүк таһымҥа тэрийэн ыыттылар.
Оҕолуун, улаханныын барыта 14 хомусчут күөн көрүстэ.
Истиҥ, иһирэх түһүлгэҕэ Николай Филиппович тапталлаах кэргэнэ Лариса Ивановна оҕолорунаан кэлэн кыттыыны ылла. Аҕаларын ахтан-санаан аастылар.
Уола Николай Николаевич Унаров аҕатын туйаҕын хатаран олус үчүгэйдик хомустаан иһитиннэрэн барыбытын үөртэ.
Дьүүллүүр сүбэ бэрэссэдээтэлинэн Харайданова Акулина Николаевна үлэлээтэ, Иванова Евдокия Ивановна күрэһи сыаналаатылар.
Ол курдук, ыаллыы сытар Туора Күөлтэн культура үлэһитэ Анатолий Свинобоев «Кылаан чыпчаал» кыайыылаах үрдүк аатын ылан Унаровтар дьиэ кэргэн туруорбут хомус бирииһинэн наҕараадаланна.
I Үрдэл үрдүк аатын «Хомус алыба» ансамбыл салайааччыта Ефимова Варвара Константиновна ылан сыаналаах бирииһинэн наҕараадаланна.
II Үрдэли «Утуму салҕааччы» анал ааты Ытык Күөлтэн Унарова Алина ылла.
III Үрдэли Турнина Нарияна ылла.
Васильева Сардаана «Көрөөччү биһирэбилэ»,
Ордахова Юлиана «Хомуһуннаах хомусчут»,
Афанасьева Маша «Кэскиллээх хомусчут»,
Ефремова Туйгулаана «Дорҕоонноох хомусчут»,
Борисова Ньургуһун «Төрүт дорҕоон»
анал ааттары, сыаналаах бириистэри тутан үөрдүлэр.
Оскуола директора Андрей Александрович Миронов оҕолору көҕүлээн «Хоҥкунас тыастаах хомусчут» диэн анал ааты ылла.
Бу курдук сүрдээх дьоһун тэрээһин илгэлээх Игидэйгэ буолан ааста.
Варвара Ефимова.