СР Хотугу многоборьеҕа биирдиилээн бастыыр иһин күрэс маҥнайгы күнүгэр күрэхтэһээччилэр үстэ төхтөрүйэн ыстаныыга уонна палкалаах сүүрүүгэ холонон көрдүлэр. Ыстаныы күрэһэ оскуола спортивнай саалатыгар буолла, онтон сүүрүү өрүскэ ыытылынна. Бэҕэһээҥҥи күн геройдарын – кыайыылаахтары уонна призердары кытта кэпсэтиибитин ааҕаргытыгар ыҥырабыт.
Атласов Всеволод
5 кылаас үөрэнээччитэ. Муома улууһун хамаандатын чилиэнэ. Иккис сылын хотугу многоборьенан дьарыктанар. Нэдиэлэҕэ биэстэ биирдии чаас дьарыктаналлар. Тренерэ- Михаил Афанасьевич Тарков. Күрэхтэһиигэ убайын Дамиры кытта сылдьар. Бастакы күн түмүгүнэн Сева палкалаах сүүрүүгэ 1 миэстэ, үстэ төхтөрүйэн ыстаныыга 3 миэстэни ылары ситиспит. «Кыайыыга эрэллээх кэлбитим» — диэн кэпсиир.
Ильина Виола
8 кылаас үөрэнээччитэ 14 саастаах. Үстэ төхтөрүйэн ыстаныыга 1 миэстэлээх. 2-с сылын Михаил Афанасьевичка дьарыктанар. Виола дьиэтигэр бары спорду өрө туталлар. Ол курдук, ийэтэ Анна Иннокентьевна-волейболистка, аҕата Афанасий Владимирович- сүүрүүк, убайа , быраата, балта Женя, Виола бэйэтэ тусталлар, Хотугу многоборьенан дьарыктаналлар.
— Оруобуна биир күн айаннаан кэллибит. Кыттааччылары үксүн билэр эбиппин. Эрдэ күрэхтэһиилэргэ көрсөөччүбүт. Бу кэнниттэн Дьокуускайга “Быстрые нарты” күрэскэ кыттыахтаахпын. 2022 ,2023 с.с. чемпион аатын сүкпүтүм. Муома уонна Таатта күнэ -дьыла майгыннаһаллар, ол эрээри өрүскэ хаар халыҥ буолан ыарахан соҕус эбит. Аһылык, олорор усулуобуйа олус үчүгэй. Маҕаһыыннарга сыана икки төгүл чэпчэкитин көрөн соһуйдубут.
Сидоренко Алена
Үстэ төхтөрүйэн ыстаныыга 3 миэстэ буолбут. 5 кылааска үөрэнэр. ДЮСШ-ҕа дарыктанар. Иккис сылын күрэхтэһиилэргэ кыттар, быйыл республиканскай таһымнаах күрэскэ сүрэхтэниитэ буолла. Алена маны таһынан футболга оонньуурун сөбүлүүр. Үөрэҕи уонна спорду тэҥҥэ дьүөрэлиир, ол курдук «4»,«5» сыаналарынан төрөппүттэрин үөрдэр. Тренерин Михаил Афанасьевич салалтатынан нэдиэлэҕэ биэстэ дьарыктанар. Хотугу многоборье көрүҥнэриттэн ордук наартаны ыстанарын ордорор.
Портнягин Богдан
Эдьигээн улууһуттан төрүттээх, 9 кылаас үөрэнээччитэ. Үстэ төхтөрүйэн ыстаныыга улахан уолаттарга 2 миэстэлээх. Маастарга кандидат. Алтыс сылын Алексей Алексеевич Шадриҥҥа ситиһиилээхтик дьарыктанар. СӨ Хотугу многоборьеҕа сборнай хамаандатын чилиэнэ. 2023 с. Красноярскай куоракка хамаанданан 2 миэстэ буолары ситиспиттэр.
Богдан игирэ бырааттаах, волейболунан дьарыктанар . Нам улууһун уонна СӨ волейболга сборнай хамаандатын чилиэнэ. Бу сайын ыытыллыахтаах “Азия оҔолоро” Аан дойдутааҕы күрэскэ Богдан Эдьигээн улууһун ааттыттан факел тутуохтаах.
Андросов Иван
Томпо улууһун Тополинай орто оскуолатын 4 кылааһын үөрэнээчитэ. Палкалаах сүүрүүгэ кыра уолаттарга 2 миэстэлээх. Тренер Ханов Руслан Зинуровичка үһүс сылын дьарыктанар. Уус-Тааттаҕа 6 оҕолоох хамаанданан кытта кэлбит. Ваня республиканскай таһымнаах күрэххэ бастакытын кытынна . Кини наартанан ыстанарын сөбүлүүр уонна ахапсаҕайга ситиһиилээхтик дьарыктанар. Манна кэлэн элбэх доҕоттордоммутун үөрэ кэпсээтэ. Ваня бастыҥ үөрэнээччи буолар. Биир дойдулааҕа Виктор Лебедев курдук спортка үрдүк ситиһиилэниэн баҕарар.
Күрэс иккис күнүгэр сүгэни быраҕыы көрүҥэ ыытылынна. Элбэх кыттааччылаах, тыҥааһыннаах киирсии Алдан өрүскэ буола турар.
Күрэхтэһии түгэннэриттэн:
Уус Таатта орто оскуолатын Медиа киинэ.