2024 сыл Дойду Бэрэсидьиэнэ Владимир Путин ыйааҕынан Дьиэ кэргэн сылынан биллэриллибитэ. Үүммүт сыл дьиэ кэргэн сыаннастарын үрдэтэргэ, бигэ туруктаах ыал ахсаанын элбэтэргэ туһуланна. Таатта улууһугар 2023 сылга үлэни өрө туппут холобур буолар 17 Ытык ыал «Бочуот кинигэтигэр» киирэр чиэскэ тиксибитэ. Саҥа сылынан үйэ аҥара сүрэхтэрин холбоон ыал буолбут дьоһун ыалларбыт бар дьонноругар ыллыктаах тыллаах истиҥ эҕэрдэлэрин, баҕа санааларын тиэрдэллэр.
Баайаҕа нэһилиэгиттэн РФ үөрэҕириитин туйгуна, “Гражданскай килбиэн” уонна Таатта улууһун сайдыытыгар киллэрбит кылаатын иһин бэлиэ хаһаайката, Баайаҕа нэһилиэгин Бочуоттаах олохтооҕо Маргарита Егоровна, норуот уус-уран оҥоһуктарын бастыҥ маастара, “Мандар Уус” “Этнологическай комплекс дириэктэрэ Николай Иванович Егоровтар дьиэ кэргэн Саха норуотун духуобунай лиидэрэ Мандар Уус бөлүһүөктүү көрүүтүн, баай нэһилиэстибэтин үйэтитиигэ дьоһун кылааты киллэрэн, үйэтитиигэ үлэлэһэр Ытык ыал: 2024 сыл Саха итэҕэлинэн Айыыһыт сыла. Хайдах эрэ барыта санаа хоту сөп түбэһэн, Арассыыйаҕа Дьиэ кэргэн, Саха сиригэр Оҕо саас сылынан биллэриллибитэ Үөһээ Айыылартан ситимнээх курдук. Кэлэр сылга дьиэ кэргэн бигэ туруктаах олохтоох, үлэлээх, бары өттүнэн көмүскэллээх буолуохтарын баҕарабыт! Оччоҕо тэлгэһэ аайы оҕо саҥата чугдаарыа, күлүүтэ чаҕаарыа. Хас ыал ахсын Айыыһыт сыла итиинэн илгийэн, сылааһынан угуттаан, ийэлии сымнаҕастык сыдьаайан киирэригэр, бу сылга, ИЛ-ЭЙЭ туругурдун! Бары дьоллоох, доруобай буолуоҕуҥ!
Орто Амма нэһилиэгиттэн үлэ бэтэрээнэ, СӨ оскуола иннинээҕи үөрэхтээһин 100 сыла анал бэлиэ хаһаайката Мария Степановна уонна «XX лет службы в государственной лесной охране РФ», «75 лет лесному хозяйству Якутии» анал бэлиэ хаһаайына Иван Иванович Слепцовтар дьиэ кэргэни норуот фольклоругар истиҥ таптал – өрөспүүбүлүкэтээҕи бэстибээл үйэ саас тухары бииргэ холбообута. Сахалыы тыыннаах дьиэ кэргэн оҕолорун, сиэннэрин Олоҥхо алыптаах эйгэтигэр умсугутан, Ийэ тылы харыстааһыҥҥа сыаналаммат кылааты киллэрэр Сахалыы куттаах дьиэ кэргэнинэн буолаллар: Саргылаах саҥа Сыл салаллан кэлбитинэн биһиги дьиэ кэргэн аатыттан истиҥ эҕэрдэбитин тиэрдэбит. Дойду Бэрэсидьиэнэ Владимир Путин үүммүт сылы Дьиэ кэргэн, СӨ Ил Дархана Айсен Николаев Оҕо саас, Таатта улууһун Аҕа баһылыга Айаал Бурцев Таптал, Эрэл, Итэҕэл сылынан биллэрбиттэрэ. Хаһан баҕарар Ийэ дойдубут чөл туруктаах буоларыгар эрэниэххэ, итэҕэйиэххэ наада. Бука бары дьоллоох буолуҥ! Туппуккут тусан, ылсыбыккыт ыпсан истин, үтүөнү эрэ үөтүҥ, кэрэни эрэ кэрэхсээн диэн кэс тылбыт бастыҥын аныыбыт.
Октябрьскай нэһилиэктэн биир тэрилтэҕэ үтүө суобастаахтык, бэриниилээхтик үлэлээбит «Аленушка» оҕо саадыгар 20 сылын анаабыт Анна Николаевна, 25 сыл эҥкилэ суох «Таатта» сопхуос бастыҥ тырахтарыыһынан үлэлээбит Николай Николаевич Смирниковтар, үйэ тухары үлэни өрө тутан, дьоҥҥо-сэргэҕэ түмсүүлээх дьоһун дьиэ кэргэн быһыытынан үтүө холобур буолаллар: Күндү биир дойдулаахтарбыт, Таатта улууһун олохтоохторо! Бука барыгытыгар саҥа Сыл салаллан кэлбитинэн истиҥ эҕэрдэ буолуохтун! Билиҥҥи тирээн турар буккуурдаах кэмҥэ олохпут үчүгэй өттүнэн хайыһан, бука бары этэҥҥэ буоламмыт инникигэ тардыһан иһиэҕиҥ. Аҕам саастаах дьонтон алгыс тылын ылан, эдэр кэнчээри ыччаттарбыт эдэрдии эрчимнээх үлэлэринэн саҥа олоҕу туттуннар. Киһи буолан сириэдийэн, майгылаах үтүөтэ буолун, олохпут тупсан истин, өрөгөйбүт үрдээтин! Ыра санаабыт ыпсан, кэлэр кэммит кэскиллээҕи кэрэһэлии турдун! Тускуо!
Уолба нэһилиэгиттэн үүнэр көлүөнэни иитиигэ дьоһун кылааты киллэрсибит СӨ үөрэҕириитин туйгуна, СӨ эбии үөрэхтээһини сайыннарыыга кылаатын иһин бэлиэ хаһаайката Анна Дмитрьевна, нэһилиэнньэ уйгулаах олоҕун түстэһэн, ОДьКХ филиалыгар уһун кэмҥэ бэриниилээхтик үлэлээбит, сахалыы сиэргэ уһуйар холобур буолар амарах аҕа, эйэҕэс эһэ Нюргустан Анатольевич Рахлеевтар: Үүммүт 2024 сыл дойдуга Дьиэ кэргэн, Саха сиригэр Оҕо саас, Таатта улууһугар Таптал, Эрэл, Итэҕэл сылларынан биллэрилиннэ. ИЛ-ЭЙЭ, дьоҥҥо-сэргэҕэ киһилии сыһыан, чөл турук, тупсаҕай олох барыта дьиэ кэргэнтэн саҕаланар. Онон, чөл олоҕу тутуһан, бэйэ-бэйэни өйөһөн-өйдөһөн, үлэни өрө тутан олордоххо олохпут уйгута-быйаҥа үтүмэн үгүс. Онон дойдубут бар дьонугар, дьиэ кэргэттэригэр, кэнчээри ыччаппытыгар баҕарабыт инникигэ ЭРЭЛИ, ИТЭҔЭЛИ, сөҕүрүйбэт ТАПТАЛЫ, муҥура суох МАХТАЛЫ!
Октябрьскай нэһилиэктэн удьуор уус спортсменнарынан сураҕырбыт, талба талааннаахтарынан аатырбыт, сахалыы сиэрдээх дьиэ кэргэн үтүө үгэһинэн, чөл олоҕу тутуһуу бастыҥ холобурун көрдөрөр Татьяна Егоровна, Василий Николаевич Портнягиннар дьиэ кэргэн: Ытыктабыллаах Өктөөбүрүскэй нэһилиэкпит олохтоохторо, биир дойдулаахтарбыт! Үүммүт 2024 сылынан үйэ аҥара бииргэ сүүс-сүүстэн өйөһөһн олорон кэлбит ыал аатыттан итии-истиҥ эҕэрдэтэ тутуҥ! Бу сы эһиэхэ туох баар үчүгэйи, кэрэни эрэ аҕаллын. Ыарыы ыалласпатын, куруук саха алмааһыныы кытаанах доруобуйалаах буолуҥ!
Мария Павлова.