Кэлиҥҥи сылларга дойду үрдүнэн «Үөрэхтээһин» национальнай бырайыак иитинэн араас тииптээх үөрэх тэрилтэлэрин материальнай-техническэй базаларын хаҥатыыга, ону тэҥэ эбии үөрэхтээһин бырагыраамаларын кэҥэтиигэ киэҥ хабааннаах үлэ барар.
Бэдэрээлинэй бырагыраама оҕо саадын иитиллээччилэрин техническэй хайысхалаах эбии үөрэхтээһиҥҥэ эрдэттэн бэлэмнииргэ уонна кэлэр көлүөнэ эт-хаан өттүнэн бигэ туруктаах буола улаатарыгар улахан болҕомтону ууран, билиини сэргэ дьоҕуру, сатабылы тэҥҥэ сайыннарарга көдьүүстээх үлэни ыытар.
«Күн туллуктара» уһуйаан үлэһиттэрэ оҕону бары өттүнэн сайыннарарга туһуламмыт бырайыактарынан араас таһымнаах куонкурустарга ситиһиилээхтик кытыннараллар. Ол курдук уһуйаан иитиллээччилэрэ Санкт Петербург куоракка ыытыллыбыт Бүтүн Аан дойдутааҕы робототехника уонна цифровой технология «Деталька-2024» күрэҕэр ситиһиилээхтик кыттан, бырайыактыыр үлэни оҥорон көмүскээһиҥҥэ 2 миэстэни, «Эдэр Пифагор» биирдиилээн күрэскэ Эрчим Башарин абсолютнай чөмпүйүөн үрдүк аатын сүгэн, «Бырайыактыыр үлэҕэ» Дана Иванова, Ариан Иовлев иккис миэстэлэри ситиһэн, төрөөбүт улуустарын дуорааннаахтык ааттаппыттара. Кырачаан иитиллээччилэр утумнаахтык дьарыктанан, өрөспүүбүлүкэтээҕи «Бырайыактыыр үлэ» күрэһигэр Дана Иванова, Ариан Иовлев — 1 м., Саша Наумов «Умсулҕаннаах ахсаан» хайысхатыгар – 2 м. ылан, төрөппүттэрин, иитээччилэрин үөрдүбүттэрэ.
2023 сылтан айымньылаах үлэлээх иитээччилэр уонна талааннаах оҕолор ситиһиилэрин үрдүк көрдөрүүлэрин түмүгэр «Күн туллуктара» уһуйааҥҥа «Хас биирдии оҕо ситиһиитэ» Бэдэрээлинэй бырайыак иитинэн үлэ миэстэтин таһаарыыга олоҕурбут 6 хайысхалаах «Саҥа үөрэх миэстэтэ» бырагырааманан техническэй уонна эти-хааны эрчийэр успуорт хайысхатыгар икки эбии үөрэхтээһин кабинета аһылынна. Аныгы үөрэх ирдэбилинэн иитиллээччилэр техническэй сатабылларын сайыннарарга үөрэхтээһин Бэдэрээлинэй үбүлээһиниттэн 382 тыһ. солк. роботехника уонна эти-хааны эрчийэн, футбол көрүҥүн сайыннарарга 137 тыһ. солк. суумалаах инвентарь көрүлүннэ. Кырачааннары сайыннаран саҥа саҕахтары арыйар «Мейкер» роботехника кабинетын эбии үөрэхтээһин педагога Светлана Степановна Расторгуева, спорт саалатыгар мини-футбол дьарыгын анал кууруһу ааспыт Сардана Никифоровна Неустроева иилээн-саҕалаан үлэлэтиэхтэрэ. Анал үөрэх кабинеттара «Күн туллуктара» биэс бөлөхтөөх уһуйаан 80 иитиллээччитин хабан дьарыктыырын таһынан манна атын оҕо саадын иитиллээччилэрэ, оскуола үөрэнээччилэрэ кэлэн дьарыктанар кыахтаныахтара.
«Күн туллуктара» уһуйаан сэбиэдиссэйэ Иннокентий Татаринов эбии үөрэхтээһиҥҥэ киирбит саҥа саҕалааһын туһунан: «Быйыл саҥа үөрэх дьылыгар «Күн туллуктара» уһуйааҥҥа аныгы үөрэх ирдэбилинэн «Робототехника» уонна «Мини-футбол» кабинеттара аһылынна. Бу барыта оҕону оскуола иннинээҕи сааһыттан өй-билии, эт-хаан өттүнэн сөптөөхтүк сайыннарар туһугар туһуланна. Оҕо кыратыттан саҥа технологиялары баһылаан, кэлин улааттаҕына ылбыт билиитин, сатабылын олоҕор көдьүүстээхтик туһанарыгар төһүү күүс, сүрүн олук буолуоҕа. Улуус, нэһилиэк дьаһалталара, үөрэҕирии салаата оскуола иннинээҕи саастаах оҕолору иитиини-үөрэтиини өйүүллэригэр, күүс-көмө буолалларыгар махталлаахпыт. Кырачааннарбыт билиилэрэ хаҥаан, сатабыллара сайдан, сылтан сыл ситиһиилэрэ эбиллэн иһэригэр баҕарыаҕыҥ», — диэн санаатын үллэһиннэ.
Бэдэрээлинэй бырайыак чэрчитинэн аһыллыбыт эбии үөрэхтээһин кабинеттара хас биирдии оҕону хаачыстыбалаах үөрэҕинэн хааччыйан, инники талар идэлэригэр суолу тэлэн, үөрэх маҥнайгы сатабылларыгар уһуйуохтара.
Мария ПАВЛОВА.