Олунньу 5 күнүгэр Дьокуускай куоракка олорор, айа-тута үлэлиир күндүтүк саныыр биир дойдулаахтарбытын кытта көрсөн, быйыл улууспутугар ыытыллыахтаах, саха спордун төрүт көрүҥнэригэр «Манчаары оонньууларын» тэрийиигэ биир санаанан турунан, бары күүһү ууран үлэлиэҕин диэн бигэ быһаарыы ылынныбыт.
«Манчаары оонньууларын»Манчаар тэрийиигэ туһуламмыт былааннары олоххо киллэрэргэ улууспут фондатыгар Андрей Джурович Данилов (Сэттэ тутуу тэрилтэтэ) 1 000 000 солкуобайы, Айаал Григорьевич Макаров, Спартак Иванович Петров (Мясной двор тэрилтэ) 1 000 000 солкуобайы, Валерий Георгиевич Малышев(Дороги Саха тутуу тэрилтэтэ) 1 000 000 солкуобайы, Юрий Николаевич Большаков(Учур тэрилтэ) 1 000 000 солкуобайы уонна Андрей Герасимович Варламов (Зодиак тэрилтэ) 500 000 солкуобайы көмө* оҥоробут уонна Дьокуускай куоракка үлэлии-хамныы сылдьар уолаттарбытын биһиги көтөхпүт бачыыммытын, тапталлаах Тааттабыт туһугар диэн санаанан салайтаран өйүөхтэрэ диэн эрэнэн туран ыҥырабыт диэн бастыҥ баҕа санааларын биллэрдилэр.
Маны сэргэ Таатта уонна Чурапчы улуустарын быысаһыытыгар баар границабытын саҥардыыга Александр Александрович Ханин, Николай Иннокентьевич Акимов, Сергей Сергеевич Игнатьев, Сергей Афанасьевич Варламов эрдэттэн өйүүллэрин биллэрбиттэрэ. Юрий Агитович Дарбасов, Сергей Иванович Софронов, Вячеслав Васильевич Яроев улууспут туһугар диэн кэскиллээх санаанан салайтаран ыытыллар тэрээһин үлэлэргэ сүҥкэн көмөнү-өйөбүлү ылан үлэлэһэн эрэллэрэ барыбытын үөрдэр.
Тапталлаах Тааттабытыттан төрүттээх күндүтүк саныыр биир дойдулаахтарбыт түмсүүлээх үлэнэн, биир бигэ санаанан туруннахпытына, түмүстэхпитинэ кыайыылаах буолуохпут диэн эрэл санааларын эттилэр.
Улууспут Аҕа баһылыгын эбээһинэһин толорооччу Руслан Игнатьевич Захаров мэлдьи күүс-көмө, өйөбүл, бөҕө тирэх буолар биир дойдулаахтарбытыгар ис сүрэҕиттэн махтанна уонна ааспыт сыллаахха улууспутугар «Манчаары оонньууларыгар» кыттыыны ылыахтаах ыраас хааннаах сүүрүк боруода аты атыылаһыыга үбүнэн-харчынан күүс-көмө буолбут дьоммутугар Айаал Григорьевич Макаровка, Спартак Иванович Петровка, Александр Александрович Ханиҥҥа, Николай Иннокентьевич Акимовка улуус аатыттан махтал суруктары туттартаата.
Түмсүүттэн тирэҕирэн кыайыы көтөллөнүөҕүн.
Түмэр