Үөрэх-билии кыһалара
Ааннарын тэлэччи аһан,
Кэлэр кэнчээрилэрбитин
Кэскиллээх аартыкка сирдииллэр.
Быйыл хас биирдии үөрэх кыһата сүргэни көтөҕөр муусука кэрэ дорҕоонунан угуйан, үүнэр көлүөнэни билии киэҥ аартыгар арыаллыыр аанын тэлэччи аһан, оҕо-аймах чуопчаарар саҥатынан туолан, Билии күнэ Арассыыйаҕа Дьиэ кэргэн, Саха сиригэр Оҕо саас сылынан ураты долгутуулаахтык саҕаланна.
Сайыҥҥы сынньалаҥ кэнниттэн күүс-уох эбинэн А.И. Софронов – Алампа аатынан Ытык Күөл 1 нүөмэрдээх оскуола боруогун 885 үөрэнээччи атыллаата. Улуус киэн тутта ааттыыр үөрэҕин кыһата Саха Өрөспүүбүлүкэтин үрдүнэн сүүрбэ «Сыл бастыҥ оскуолатын» ахсааныгар киирбитэ. Билии бырааһынньыгын үөрүүлээх чааһыгар оскуола чиэһин үгүстүк көмүскээбит үөрэнээччилэр, үөрэх кыһатын бастыҥ выпускниктара Сардаана Дедюкина, Лия Мартынова, Андрей Ефимов, Вадим Андросов өрөгөй ырыатын доҕуһуолунан РФ Судаарыстыбаннай былааҕын күөрэччи тутан киллэрэр чиэскэ тигистилэр.
Оскуола дириэктэрэ Иван Будикин Арассыыйаҕа уонна Саха Өрөспүүбүлүкэтигэр оскуола аатын ааттаппыт Бүтүн Арассыыйатааҕы «Профессионал» күрэс «Лечебное дело» кэмпэтиэнсийэтин призера Вадимир Андросов, мас-реслиҥҥэ Арассыыйа чөмпүйүөнэ Айтал Винокуров, оскуола үөрэнээччилэрин ортотугар Бүтүн Арассыыйатааҕы ОБЖ олимпиадатын кыттыылааҕа Эрхан Андросов, Уһук Илиҥҥи Бэдэрээлинэй уокурукка «Көтөр мээчик» волейбол күрэһин кыттыылаахтара Николай Турнин, Айархаан Бродников, Эдуард Туласынов, Дмитрий Собакин, Степан Васильев, Анатолий Дьяконов, Ньургун Кривошапкин киэҥ билиилэринэн, инникигэ дьулуурдарынан үөрэнээччилэргэ үтүө холобур буолалларын бэлиэтээтэ. Ол курдук үөрэнээччилэр оскуола эдэр чинчийээччилэрэ Наукалар аччыгый Академияларын стипендиаттара Саргылана Неморицына, Сардаана Дедюкина , Дьулустаан Щукин, Ян Оконешников, Жанна Алексеева, Мария Пахомова бастыҥ холобурдарынан салайтаран, үөрэххэ дьулуурдарынан саҥа аартыктары арыйа туралларыгар, Ийэ дойдуларыгар бэриниилээх буола үүнэллэригэр баҕа санаатын биллэрдэ.
Саҥа сүүрээн быһыытынан быйыл Алампа аатынан орто оскуолаҕа юридическай кылаас аһыллыбытынан Таатта улууһун прокурора Егор Эверстов оскуола үөрэнээччилэригэр саҥа үөрэх дьылыгар хас биирдии гражданин сокуону билиэхтээҕин санатан, бэйэ быраабын көмүскүү үөрэнэллэригэр баҕарда.
Улуус дьокутааттарын Сэбиэтин бэрэссэдээтэлэ Петр Максимов Дойду Бэрэсидьиэнэ Владимир Путин өттүттэн үөрэх эйгэтигэр улахан болҕомто уурулларын санатан туран, быйыл оскуола иһинэн 8 кылаастарга юридическай кылаас аһыллыбытын билиһиннэрдэ. Онон үөрэнээччилэр элбэх билиини сомсон, дьоҕурдарын сайыннаран, сатабылларынан салайтаран, үлэнэн иитиллэн Ийэ дойдуларыгар бэриниилээх буолалларыгар баҕарда. Үөрүүлээх түгэҥҥэ «Таатта улууһа» МО баһылыгын солбуйааччыларын ааттарыттан анал байыаннай дьайыыга сылдьар Эр Хоһууттарбыт кырачааннарыгар Александра Диодороваҕа, Дайаана Бурнашоваҕа, Елизавета Поповаҕа сэмэй бэлэхтэри туттарда.
«Таатта нэһилиэгэ» МТ баһылыгын солбуйааччы Артур Миронов оскуола боруогун саҥа атыллаабыт маҥнайгы кылаас кырачааннарыгар уонна үөрэнээччилэргэ киэҥ билиилэринэн ситиһии сиэтиилээх дьон буола үүнэллэригэр, оскуола выпускниктарыгар дьулуурдаахтык үөрэнэн талбыт идэлэригэр туттарсар дьоҕурдары иҥэринэллэригэр баҕарда.
Улуустааҕы үөрэх управлениетын начальнигын солбуйааччы Татьяна Тютрина киһи үөрэх-билии аартыгын арыйарыгар олоҕун маҥнайгы олуга, сүрүн акылаата оскуола дьиэҕэ уурулларын тоһоҕолоон бэлиэтээтэ. Билиҥҥи кэмҥэ үөрэх ситимэ күнтэн-күн уустугура, ирдэбилэ күүһүрэ турарынан үөрэнээччилэр айар дьоҕурдарынан, бэриллибит талааннарынан, киэҥ билиилэринэн хорсуннук сайдыы суолунан эрэрллээхтик хардыылыылларыгар баҕарда. Оҕолор төрөппүттэрин, учууталларын саҥаттан-саҥа кыайыыларынан кынаттыы, ситиһиилэринэн үөрдэ, саҥа үөрэх дьылыгар ураты арыйыылары оҥороллоругар, үрдүк дабайыылары ситиһэллэригэр баҕарда.
Оскуола бастыҥ выпускниктарын аатыттан Сардаана Дедюкина быйылгы үөрэх дьыла оскуоланы бүтэрээччилэргэ олус долгутуулаах уонна эппиэтинэстээх сылынан буоларын өйдөөн туран, кыһаллан үөрэнэргэ, үгүһү ситиһэргэ эрэннэрэллэрин биллэрдэ. Саҥа үөрэх сыла оскуола бары үөрэнээччилэригэр эрэллээх доҕоттору, саҥа билиилэри, умнуллубат кэрэ түгэннэри бэлэхтииригэр тус санааларын этэн туран, 11 кылаас үөрэнээччилэрэ оскуола боруогун атыллаабыт маҥнайгы кылаас үөрэнээччилэригэр баҕа санаалаах самолеттарын бэлэх ууннулар, ситиһиллиэхтээх баҕа санаа толору туоларын туһугар үөһээ шариктары көтүттүлэр.
Умнуллубат бэлиэ күн маҥнайгы кылаас үөрэнээччилэр бар дьон дьокутаата Виктор Лебедев сэмэй бэлэҕин туттулар.
Быйылгы саҥа үөрэх дьылын арыйар алтан чуорааны маҥнайгы кылаас үөрэнээччилэрэ Айтал Софронов, Арылхан Слепцов, Амелия Петрова уонна Алампа аатынан стипендия хаһаайката, «Инникигэ хардыы» научнай-практическай кэмпэриэнсийэ лауреата, «Барҕарыы» национальнай пуонда бириэмийэ хаһаайката, Дойду таһымыгар Москуба куоракка ыытыллыбыт «Национальное достояние России» күрэс лауреата, «Будущее Российской науки» мэтээл хаһаайката Лия Маркова, Саха Өрөспүүбүлүкэтигэр мас-реслинг призера Денис Васильев, үөрэх туйгуна, Бүтүн Арассыыйатааҕы, Саха Өрөспүүбүлүкэтээҕи «Инникигэ хардыы» научнай-практическай кэмпэриэнсийэ лауреата, эдэр ыччаттарга Арассыыйатааҕы «Бастыҥ инновационнай бырайыак» анал аатын хаһаайката Саргылана Неморицына алтан чуорааны тыаһаттылар.
Бүгүҥҥү күнтэн саҕалаан оҕолорбут билиилэрин хаҥатан, сатабылларын сайыннарар, дьоҕурдарын сайыннарар, үтүөҕэ-кэрэҕэ талаһар умнуллубат кэрэ кэмнэрэ саҕаланна.
Мария Павлова.
Видеоматериалы бэлэмнээтэ Михаил Копырин.