Өрөбүл күннэргэ Томпо улууһун киинигэр Хаандыгаҕа «Кубок Главы Томпо» бу сылга маҥнайгы рейтинговай, А категориялаах күрэхтэһиигэ Таатта улууһун хамаандатыгар Харбалаахтан биэс, Чымынаайыттан биир, Чычымахтан икки буолан кыттан, күрэс тыынын билэн кэллибит.
Бары кэриэтэ саҥа саҕалааччы охчуттар бэйэлэрин маннык улахан күрэхтэһиигэ тургутан көрбүттэрэ хайҕабыллаах.
Күрэс тэрээһинин Томполор, салайааччы П.С.Андросов ох сүрүн тренера, ЦСиК Алроса дириэктэрэ тэрийдилэр.
Түмүккэ Таатталар:
Кыргыттарга: Борисова Дайаана – үһүс миэстэ.
Уолаттарга: Оконешников Саша – үһүс миэстэ.
Эр дьоҥҥо: Тистяхов Виктор – үһүс миэстэлэри ыллылар.
Уопсай түмүккэ хамаанда биир очукуонан халан төрдүс миэстэ буолары ситистэ.
Уолба учуутала Ольга Кусатова — КМС, биэс оскуола кыргыттара 1-2 юношесткай, уолаттарга Саша 1-кы юношесткай, эр дьоҥҥо икки охчут 2-3 спортивнай разряд нуорматын толордулар.
Сыыһаларбытын, халтыларбытын көннөрүнэргэ сүбэ-ама ылан, күрэс тыыныгар уопутуран кэллибит.
Харбалаахтан Таатта чиэһин көмүскээтилэр: Ньургуяна, Виталий Яковлевтар, Борис Борисов, Саша Оконешников уонна мин.
Барҕа махтал тылларын тиэрдэбин Норуот депутатыгар, «Төлөн» АО сал. Рахлеев Прокопий Дмитриевичка, Кондрашов Виктор Викторовичка уонна бары үлэһиттэригэр бензинынан хааччыйан көмөҕүт иһин.
Манчаары оонньууларыгар киирэр Төрүт Ох көрүҥэр үүнэн-сайдан иһиэхпит, үрдүк кирбиилэри дабайыахпыт!
Ньургун Тистяхов, тренер.