Россия бэчээтин күнүнэн эҕэрдэлиибин!

Саха Өрөспүүбүлүкэтин Ил Түмэнин аатыттан уонна тус бэйэм ааппыттан эһигини Россия бэчээтин күнүнэн эҕэрдэлиибин!

Бү күн – Сурук-бичик сайдыытын туһугар, кылаан Кырдьык иһин күннэтэ туруулаһан, иһитиннэрэр-биллэрэр эйгэҕэ бэриниилээхтик үлэлиир ытык дьоммут хорсун ситиһиилэрин бэлиэтиир тоҕоостоох түгэн. Эһиги үлэҕит-хамнаскыт судургута суох, идэҕэ бэриниилээх буолууну, улахан тулууру, айымньылаах сыһыаны эрэйэр.

ХХІ үйэ бастакы чиэппэрин түмүктүүр саҥа 2025 сыл үүннэ. Бу кэрчик кэмҥэ суруналыыстар сүрэхтэригэр-быардарыгар түһэр, дьон дьылҕатын уларытар историческай, киэҥ далааһыннаах событиелар үгүс этилэрэ. Суруналыыс аптарытыаттаах тылыттан биһиги биир сомоҕо буолуубут бөҕөргөөтө, бэйэбит кыахпытыгар эрэлбит улаатта.

Билигин информация түргэн тэтимнээхтик тарҕанар кэмигэр аныгы информационнай технологиялар пресса сайдарыгар саҥа суоллары арыйаллар, ол иһигэр искусственнай интеллеги туһанан. Онон эһиги үлэҕит хаһааҥҥытааҕар да өссө ордук суолталанна уонна улахан эппиэтинэһи ирдиир буолла.

Эһиги айар, айымньылаах үлэҕитигэр иэйии, саҥаттан саҥа чаҕылхай идеялар киирэ туралларыгар уонна кыларыйан турар кырдьыгы, чахчыны хорсуннук сырдатаргытыгар баҕарабын. Эһиги матырыйаалларгытын дьон-сэргэ сэҥээрдин, ол матырыйааллартан өрө көтөҕүллэр, билиитин хаҥатар уонна олоҕор туһанар буоллун, оттон хас биирдии ыстатыйа уонна бэлиэтээһин бүтүн уопсастыба олоҕор улахан суолталаах, туһалаах буолуохтун!

Саха Өрөспүүбүлүкэтин

Ил Түмэнин Бэрэссэдээтэлэ

А. И. Еремеев

Читайте дальше