Саха талааннаах бастакы норуодунай поэта, Аҕа дойдуну көмүскүүр Улуу сэрии кыттыылааҕа Серафим Романович Кулачиков -Эллэй Боотурускай улуус Аллараа Амма нэһилиэгэр төрөөбүтэ бүгүн 120 сылын туолла.
«Кыһыл хоһоон» диэн бастакы кинигэтэ 1925 с. бэчээттэнэн тахсыбыта. Кини саха поэзиятыгар пионер, комсомол, эдэр саас, саҥа олох төлөннөөх ырыаһытын быһыытынан киирбитэ, уһулуччу талааннаахтык төрөөбүт дойду, гражданскай сэрии геройдарын туһунан хоһооннору, ырыалары суруйбута. Ол кэмтэн барыта 26 хоһоон уонна поэма кинигэлэрин бэчээттэппитэ. Эллэй хоһоонноругар суруллубут «Элбээн эрэбит», «Үс ыстыык үөһүгэр», «Таба», «Өр да мин эйиигин күүппүтүм», «Үөрүүм-көтүүм, үрдээ», сэрии кэмигэр суруллубут «Өкүлүүн», «Бырастыылаһыы», «Капитан Гастелло», «Таптыаҕыҥ ийэни» уонна да атын ырыалар уостан түспэккэ ылланаллар.
Серафим Романович норуот уус-уран айымньытыгар олоҕуран, «Чурумчуку» диэн остуоруйа-поэманы суруйбута. 1939-1948 сс. Саха сирин суруйааччыларын союһун бырабылыанньатын бэрэссэдээтэлинэн үлэлээбитэ.
Эллэй үгүс айымньылара нууччалыы тылбаастанан Советскай Союз ааҕааччыларыгар биһирэммитэ. Кини А.С.Пушкин «Медный всадник», В. Маяковскай «Владимир Ильич Ленин», Тарас Шевченко, Николай Тихонов уо. д. а. айымньыларын сахалыы тылбаастаабыта.
1955 с. Саха АССР Верховнай Сэбиэтин депутатынан талыллыбыта.
Октябрьская революция, Үлэ Кыһыл Знамята, «Бочуот Знага» орденнар кавалердара. Саха комсомолун бириэмийэтин лауреата. Таатта улууһун Бочуоттаах гражданина.
С.Р. Кулачиков — Эллэй аатынан Чычымах орто оскуолата, Дьокуускайга, Ытык Күөлгэ, Чычымахха уулуссалар ааттаммыттара.
