Биһиги төрөөбүт төрүт тылбытын билэрбит тухары саха омук буолан сандаарыахпыт, киһи буолан кииллийиэхпит, үүнэн-сайдан иһиэхпит. Оттон тылбыт кэхтибэтин туһугар күннэтэ сыралаһан, сэмэй кылаатын киллэрэ сылдьар дьонтон биирдэстэрэ Таатта улууһун Николай Егорович Мординов – Амма Аччыгыйа аатынан Харбалаах орто оскуолатын үөрэхтээһин холбоһугар 47-с сылын саха тылын уонна литэрэтиирэтин учууталынан таһаарыылаахтык үлэлиир сылдьар Валентина Семеновна Кривошапкина саха тылын кэскилин туһунан бэйэтин санаатын үллэстэр:
— Биһиги киэн туттар биир дойдулаахпыт, саха сээркээн сэһэнньитэ Николай Егорович Мординов-Амма Аччыгыйа «Саха тыла — муора курдук баай. Саха омук тыла — үрүйэ уутун курдук сэргэх, сир симэҕин курдук сиэдэрэй», — диэн этэн турар, чахчыта да оннук. Тапталлаах төрөөбүт тылбытынан сахалыы санаабытын сайгыччы этэ, кэпсэтэ сылдьарбыт саҕа дьол суох ини… Ол эрэн, сылтан-сыл ийэ тылбыт дьадайан, буомуран иһэрэ баар көстүү.
Мин 47-с сылбын төрөөбүт тыл учууталынан үлэлиир, саха тыла сарсыҥҥылаах буоларын туһугар туруулаһар киһи — олус ыарыылаахтык ылынабын. Туох барыта дьиэ кэргэнтэн олус тутулуктаах. Дьиэлэригэр эбэлээх, эһэлээх ыал оҕолоро саҥалара кэм туруктаах, кэпсэтиигэ өс хоһоонун, сомоҕу домоҕу кыбытан ылар түгэннээх буолаллар. Оттон үгүс ыал оҕото олус судургу тыллаах-өстөөх буолбута — баар суол. Итини олох сайдыытын кытта сибээстиибит: оҕо барахсан тыллана илигиттэн төлөпүөн, былансыат доҕордоох улаатар, ол түмүгэр уу нууччалыы саҥара сылдьар кырачааннар маҥнайгы кылааска кэлэллэр, бу тыа сиригэр эмиэ баар көстүү. Кинилэри кэм сахатыта сатыыбыт. Аны онно сүрүн мэһэйинэн алын сүһүөх кылаастарыгар төрөөбүт тылы үөрэтии чааһын сарбыйыы буолла. Нэдиэлэҕэ биир чаас саха тылын уруогар төһө бэйэлээҕи ситиһиэҥий? Итиннэ сүрүн тирэх дьиэ кэргэн буолар. Дьиэҕэ сахалыы тылынан кэпсэтии, олох туһунан толкуйдуурга, сыыйа анааран өйдүүргэ хайысхалааһын ыытыллара буоллар диэн баҕалаахпын. Сахалыы уус-уран литэрэтиирэни оҕолор, ыччат дьон олох аахпат буоллулар. Сахалыы ааҕыы — ийэ тыл баайыгар уһуйуллуу сүрүн тирэҕэ буоларын умнуо суохтаахпыт. Сахабыт тыла сүппэтин, кэскиллээх буоллун!
А.Неустроева.