Соторутааҕыта Ытык Күөлгэ истибэттэр обществоларын үлэтин сыллааҕы отчуотугар баран кэллим. Мунньаҕы өрөспүүбүлүкэтээҕи истибэттэр обществоларын салайааччыта Максимова Ульяна Павловна ыытта. Бу обществоҕа улууска 134 учуокка турабыт. Улуус истибэттэр обществоларын салайааччыта Светлана Дмитриевна Дорофеева отчуот оҥордо. Усунуоһу төлөөһүн сыл аайы 100% эбит. Үксүбүтүгэр сүппүт, болдьоҕо ааспыт ИПР толорууга, онон туһаныыга үгүс үлэни ыыппыт. Саҥалыы бырайыактары үлэлэтэн, араас өрүттээх үлэлэри ыытан, сыл түмүгүнэн өрөспүүбүлүкэҕэ истибэттэр обществоларыгар «Бастыҥтан бастыҥ» уонна «Сыл суруналыыһа» номинациялары ылбыт. Көхтөөх буолан «Социальнай реабитализация» үөрэххэ квалификацияны үрдэтиигэ иккитэ Москваҕа үөрэнэн кэлбит уонна кыаллан сылдьар эйгэ эксперигэр (эксперт по доступной среде) үөрэнэн диплом ылбыт эбит. Былырыын туризмҥа бырайыагынан Амма эбэнэн улуус уонна үлэ министиэристибэтэ өйөөннөр буор-босхо круиз оҥорбут. Элбэх оҕолоох ийэлэргэ халадаай ырбаахы тигиитигэр эмиэ буор-босхо маастар-кылаас ыыттарбыт. Өрөспүүбүлүкэ уонна олохтоох бюджеттан харчы туруорсан, быйыл “Манчаары оонньууларыттан” ордубат үптэн күүскэ туруорсан, круиһы олоххо киллэрэр буолбут. Улуус киинигэр сылга үстэ улахан сэргэхситэр тэрээһиннэри ыытар, онно биһиэхэ нэһилиэктэргэ хас биирдиибитигэр биллэрэн, сылдьан, кыттан, астынан кэлээччибит. Аанньа истибэт киһи элбэх дьоннуун бодоруспат, маннык тэрээһиннэргэ биир кыһалҕалаахтар аһыллан ыллаан, күрэхтэһэн, үҥкүүлээн санаабыт чэпчиир. Истэр аппарат, дьиэ, чох боппуруостарыгар көмөтүгэр С.Д.Дорофееваҕа үгүс махталлар этилиннилэр. Түмүккэ үлэ «үчүгэйинэн” сыаналанна. Куоластааһын түмүгүнэн олохтоох общество бэрэссэдээтэлинэн биир санаанан С.Д.Дорофеева талылынна. Учуокка турар дьон үксүбүт сааһыран истибэппитинэн эрэйдэнэн турбут дьоммут. Эдэр оҕо аҕыйах. Бу оҕолор төрөппүттэрин хайҕыахха сөп. Аһааҕырыы, дириҥии илигинэ аппарат кэтэн аһааҕырыыны сайыннарбаттар. Кулгаах аппаратын кэтии син ачыкы кэтэр кэриэтэ. Билигин аанньа истибэт эдэрчи дьон элбэхтэр, биһиги курдук дириҥэппэккэ, доруобуйаҕытын көрүнүҥ диэн сүбэлиэм этэ. Олоҕу толору көрөн-истэн олоруу дьол буоллаҕа.
Изабелла Харлампьева, Харбалаах с.