Таатта маастардара Новосибирскэй куораты Аан Алахчын Хотун хаар скульптуранан киэргэттилэр

 Новосибирскэй куоракка саҥа Сылга бэлэмнэнии быһыытынан  сыллата ыытыллар «Новосибирск — родина снежных баб» хаар скульптура бэстибээлигэр Ытык Таатта уран тарбахтаахтара кыттан, кыайыы көтөллөөх кэллилэр. Үрдүк таһымнаах күрэскэ Арассыыйа араас эрэгийиэннэриттэн бастыҥ маастардар кыттыыны ыллылар. Тааттатааҕы «Эдэр натуралистар ыстаансыйаларыттан» Василий Назаров уонна «Эрэл» реабилитационнай киин иитээччитэ Афанасий Варфоломеев «Таатта» хамаандата ситиһиилээхтик кыттан 1 миэстэни ылла. Күрэс кыттыылаахтара биэс күн устата дириҥ ис хоһоонноох хаар композицияны оҥордулар.

Талааннаах маастардар 2022 сыллаахха Магадааҥҥа ыытыллыбыт муус оҥоһук күрэһигэр иккис бочуоттаах миэстэни ылар чиэскэ тиксибиттэрэ. Быйыл Дьокуускай куорат 202 оройуонугар муус паарканы оҥорууга норуоттар икки ардыларынааҕы күрэскэ ситиһиилээхтик кыттан, үс анал аат хаһаайыттарынан ааттаммыттара.

Саҥа үүммүт сылга «Новосибирск — родина снежных баб» хаар скульптура бэстибээл балаһыанньатынан эскиис ыытан, куонкуруһу ааһан, ыҥырыы туппуттара. Биир дойдулаахтарбыт өрөспүүбүлүкэтээҕи уонна да атын эрэгийиэннэр күрэстэригэр маастардар үлэлэрин көрөн, үгүс үөрүйэҕи ылынан, араас омуктары кытары алтыһан үлэлээтилэр.

Хаар композиция ааптара Василий Назаров: «Дьүүллүүр сүбэ ордук тымныы сарыыссатын быһыытынан сахалыы сиэринэн оҥоһуллубут Аан Алахчын Хотун уобараһын сэҥээрдилэр», — диэн санаатын үллэстэр. Мантан саас Василий Назаров Дьокуускайга ыытыллар «Үрдэл» пааркаҕа уонна Байкал эҥэр ыытыллар муус күрэҕэр кыттар баҕа санаалаах.

Талааннаах маастардар мас, муус, хаар оҥоһугунан утумнаахтык дьарыктанан, үгүс оҕону эбии дьарык нөҥүө уһанарга уһуйаллар, араас таһымнаах улахан күрэстэргэ кытыннараллар. Инникитин даҕаны Таатта талааннаахтара үрдүк таһымнаах күрэстэргэ кыттан дойдуларын ааттата, кэлэр көлүөнэ бастыҥ маастарыстыбаҕа уһуйа туралларыгар баҕарыаҕыҥ!

Мария Павлова.

Василий Назаров уонна Афанасий Варфоломеев хаартыскаларыттан.

Читайте дальше