Бүгүн Былатыан Ойуунускай аатынан норуоднай тыйаатырыгар Саха Өрөспүүбүлүкэтин Бырабыыталыстыбатын отчуота буолан ааста. Үөрүүлээх быһыыга майгыга үтүө үлэлээх биир дойдулаахтарбытыгар наҕараада туттарыыта буолла. СӨ Бырабыыталстыбатын бэрэссэдээтэлэ солбуйааччы Сергей Васильевич Местников Аҕа Дойду Улуу сэриитин кэмигэр тыылга оҕо саастарыттан үлэлээн Кыайыы дьыалатыгар тус кылааттарын киллэрсибит дьоммутугар — Аргунова Татьяна Яковлевнаҕа, Васильева Елена Константиновнаҕа уонна Тихонова Лидия Ивановнаҕа — «Аҕа дойду Улуу сэриитигэр Кыайыы 80 сылыгар» үбүлүөйдээх мэтээллэри туттарда.
Отчуоттуур бөлөх Таатта киинин олохтоохторун өрөспүүбүлүкэ салалтатын сыллааҕы үлэтин түмүктэрин кытта билиһиннэрдэ. Сергей Местников дакылаатын истэн баран олохтоохтор бэйэлэрин боппуруостарын, туруорсууларын эттилэр.
Таатта нэһилиэгэр сытыытык турар боппуруос — Олимпийскай хочуолунайын боппуруоһугар Лев Кириллович Соров — “Бырайагы оҥотторо сылдьабыт, ол бырайыагы “Модернизация коммунальной инфраструктуры” диэн федеральнай программаҕа заявка быһыытынан киллэриэхпит. Итинник улахан хочуолнайдар бары быраграмманан тутуллаллар. Ол киириэр дылы араас ньымалары көрөргө былааннанныбыт” диэтэ. Ол курдук, хочуолнай кыамтатын улаатыннарар сыалтан эбии горелка туруорар былааннаахтарын эттэ.
Итиэннэ, олохтоохтор Дьокуускай-Таатта маршрутунан сылдьар автобус наадатын эттилэр, онуоха суол сулууспатын уонна автомобильнай транспорт департаменын салайааччытын солбуйааччы Кривошапкин Сергей Александрович кыһыҥҥы бириэмэҕэ оннук автобус айана киирэр кыахтааҕын эттэ.
Былырыын суолбут алдьанан, биир улахан боппуруоспут диэн федеральнай суол туруга буолла. Бугуев Евгений Андреевич, “Вилюй” суол управлениетын начальнигын солбуйааччыта, асфальт киириитигэр былаан быһыытынан 7 бырайыак оҥоһулла турарын кэпсээтэ, уонна 2030 сылга дылы асфальт кэлиэ диэн мэктиэлээтэ.
Ону тэҥэ, олохтоохтор уматык сыанатын хонтуруола, эдэр специалистарга дьиэлэр, мелиорация, сир өттүнэн уо.д.а. ыйытыктары биэрдилэр, эппиэттэрин туттулар. Олохтоохтор боппуруостара, туруорсуулара боротокуолга киирдэ.
Нэһилиэк олохтоохторо Ил Дархаҥҥа Айсен Сергеевич Николаевка, бырабыыталыстыбаҕа, Сергей Васильевичка, куруук дьон-норуот ортотугар сылдьар депутаттарбытыгар Прокопий Дмитриевич Рахлеевка уонна Виктор Николаевич Лебедевка үлэлэрин, Тааттаҕа болҕомтолорун иһин махтаннылар уонна бырабыыталстыба үлэтин үчүгэйинэн сыаналаатылар. “Мин Таатта улуууһар үгүстүк сылдьабын. Араас сылларга туруорсуулар сытыылар этэ, онно былааҥҥа киирбит үлэ-хамнас ыытыллан дьон санаата кэлбитин киһи үөрэр. Бастатан туран биһиги махталлаах буолуохтаахпыт Ил Дархаммытыгар. Айсен Сергеевич Таатта улууһугар болҕомтотун күүскэ уурар. Кини Тааттаҕа хаста да сылдьан, мунньахтаан, барыахтаах үлэ былаанын бигэргэтэн, үлэни Бырабыыталстыбаттан уонна олохтоох дьаһалтаттан ирдээн ити үлэ-хамнас ыытылынна” — диэн эттэ Сергей Васильевич.
Таатта улууһун администрацията.