Ытык Таатта килбэйэр киинигэр 2025 сылга национальнай спорт көрүҥнэригэр ыытыллар XXII «Манчаары оонньууларын» спартакиадатын көрсө элбэх хайысхалаах доруобуйаны-чэбдигирдэр спортивнай комплекс уонна сүүрэр көбүөрдээх, 1000 олорор миэстэлээх стадион бастакы көмүс акылааттарын түөрэхтэрэ уурулунна.
Дьон-сэргэ долгуйа кэтэһэр тутууларын үөрүүлээх тэрээһинигэр Үрдүкү салалтаттан СӨ Бырабыыталыстыбатын бэрэссэдээтэлин бастакы солбуйаччы Сергей Местников, СӨ Бырабыыталыстыбатын бэрэссэдээтэлин солбуйааччытын көмөлөһөөччүтэ Александр Сафонов, СӨ Тутууга миниистирин солбуйааччы Евгений Афанасьев, СӨ физическэй култуураҕа уонна спортка миниистирин солбуйааччы Гаврил Мохначевскай, «Баһылай Манчаары» аатынан спорт национальнай көрүҥнэрин киинин салайааччыта Геннадий Васильев, маассабай спортка уонна физическэй култуура управлениетыттан тутуу салайааччытын солбуйааччы Петр Сивцев, СӨ Судаарыстыбаннай сакааска сулууспа генеральнай дириэктэрин солбуйааччы Михаил Черов, СӨ Судаарыстыбаннай сакааска сулууспатын производственнай салаатын салайааччы Гаврил Эртюков, СӨ Тыатын хаһаайыстыбатын министиэристибэтиттэн тыа сирин территорияларын сайыннарыы салаатын салайааччытын эбээһинэһин толорооччу Михаил Ушницкай, хонтуруоллуур салаа техническэй надзоруттан Михаил Нестеров кыттыыны ыллылар.
XXII «Манчаары оонньууларын» спартакиадатын иитинэн Судаарыстыбаннай бырагыраама чэрчитинэн тутуллар элбэх хайысхалаах чэбдигирдэр спорт комплекс сиэрин-туомун РФ Бочуоттаах пиэрмэрэ, Таатта улууһун уонна Амма нэһилиэгин Бочуоттаах олохтооҕо, СӨ Тыатын хаһаайыстыбатын уонна экологиятын туйгуна, Бочуоттаах меценат, үлэ бэтэрээнэ, алгысчыт Данил Егорович Афанасьев ыытта.
Үгүс оҕо-уруу тоҕуоруһа түмсэр, дьон-сэргэ сөбүлээн мустар Ф.М. Охлопков аатынан пааркаҕа анал сүүрэр көбүөрдээх, 1000 миэстэлээх стадион бастакы көмүс сыбаайа сиэрин Парасковья Аржакова алгыс сиэрин ситэрэн, туомун толордо.
СӨ Бырабыыталыстыбатын бэрэссэдээтэлин солбуйааччы Сергей Местников: «Спортивнай комплекс Саха сиригэр суох кэрэ көстүүлээх, биир уһулуччу эбийиэгинэн буолуоҕа».
Үөрүүлээх түгэҥҥэ Сергей Местников Таатта улууһугар сүдү суолталаах спортивнай уораҕай тутуллар тэрээһин бэлиэ күнүгэр нэһилиэк олохтоохторугар СӨ Ил Дархана Айсен Николаев уонна Үрдүкү Бырабыыталыстыба аатыттан истиҥ эҕэрдэтин тиэртэ. 2020 сыллаахха от ыйын 3 күнүгэр СӨ Ил Дархана А.С. Николаев 2025 сыллаахха «Манчаары оонньуулара» ыытыллар дьаһалыгар илии баттаан, Таатта улууһун олохтоохторун уйгута тупсарыгар, инфраструктураны сайыннарыыга социальнай суолталаах эбийиэктэр тутууларын бигэргэтэн, тус сыаллаах үлэ-хамнас саҕаланан: саҥа 450 миэстэлээх, олорор интэринээттээх үөрэх кыһата, доруобайаны тупсарар поликлиника, спортивнай эбийиэктэр тутуулара, суолу-ииһи тупсарыыга киэҥ хабааннаах былааннаах үлэ ыытылларын билиһиннэрдэ. Өрөспүүбүлүкэ үрдүнэн маннык спортивнай комплекс аан маҥнай тутулларын, улуус олохтоохторо спордунан дьарыктаналларыгар табыгастаах, чэгиэн туруктаах, бөҕө тирэхтээх ыччаттар тахсалларыгар олук ууруллубутун бэлиэтээтэ. Элбэх хайысхалаах спортивнай комплексы өрөспүүбүлүкэҕэ биллэр бастыҥ тутааччы А.М. Ханин салайааччылаах «Монтажник» ПК бэриллибит болдьоххо олоххо киллэрэр бигэ санаатын биллэрэн туран, улуус дьонугар-сэргэтигэр хаачыстыбалаах тутууну олоххо киллэрэригэр, өйөбүл-тирэх буоларга баҕа санаа бастыҥын анаата.
СӨ физическэй култуура уонна спорт миниистирин солбуйааччыта Гаврил Мохначевскай: Баараҕай тутуу элбэх ыччаты, дьону-сэргэни түмэ, Таатта улууһа үүнэ, сайда турдун!
Таатта улууһун бары олохтоохторугар, спорт бэтэрээннэригэр, уопсастыбаннаһыгар көмүс акылаат түспүт күнүнэн уонна Саха сиригэр спорт хамсааһынын бэлиэ сылынан Саха өрөспүүбүлүкэтин спортка министиэристибэтин аатыттан истиҥ эҕэрдэтин эттэ. Таатта улууһугар ыытыллар «Манчаары оонньуулара» үс нэһилиэгинэн ыытылларын иһитиннэрэн туран, тэрийэр хамыыһыйаны кытта бары хайысхаҕа тэҥҥэ, бары бииргэ үлэлэһэн, спортивнай спартакиаданы үрдүк таһымҥа тэрийэн ыытарга ыҥырда.
Таатта улууһун Аҕа баһылыга Айаал Бурцев: Баай үөрүйэхтээх тутааччы Александр Михайлович Ханин спортивнай эбийиэктэри үлэҕэ киллэрэригэр бигэ эрэллээхпит. Дьону-сэргэни түмэр, чэбдигирдэр спорт киинэ иккис тыыннаныа.
Улуус баһылыга сэтинньигэ улуу дьоммут П.А. Ойуунускай, Саха өрөспүүбүлүкэтин бастакы Президенэ М.Е. Николаев күн сирин көрбүттэрин сырдатан туран, Дьокуускай куоракка СӨ Бырабыыталыстыбатын дьиэтигэр Сергей Местников салайыытынан норуот чулуу уола Былатыан Ойуунускай төрөөбүтэ 130 сылыгар аналлаах тэрээһин үрдүк далааһыннаахтык ыытыллыбытын билиһиннэрдэ. Саха өрөспүүбүлүкэтигэр физическэй хамсааһын 100, Таатта улууһугар спорт хамсааһынын 80 бэлиэ сылларыгар саҕаланар спортивнай эбийиэктэр тутууларын улахан суолталааҕынан аахта. Улуус Аҕа баһылыга Дойду Президенэ Борис Ельцин 30 сыл анараа өттүгэр П.А. Ойуунскай 100 сыллаах үбүлүөйдээх сылыгар Тааттаҕа ыалдьыттаабыт түгэнин үтүө тылынан аҕынна.
«Тааттыныскай нэһилиэк» МТ баһылыга Егор Павлов: «Улууска «Манчаары оонньуутун» спартакиадатын иһинэн үгүс үлэ ыытылларынан СӨ Ил Дархана Айсен Николаевка, СӨ Бырабыыталыстыбатын бэрэссэдээтэлин бастакы солбуйааччыта, тэрийэр кэмитиэт салайааччыта Сергей Местниковка махтаныах эрэ тустаахпыт».
Нэһилиэк баһылыга Егор Павлов «Манчаары оонньуута» спартакиада ыытылларынан, бэйэбититтэн тутулуктааҕы умнубакка, нэһилиэк ис-тас көстүүтүн тупсарыыга күүстээх үлэни ыытар соруктаахпытын бэлиэтээтэ.
СӨ Тутууга миниистирин солбуйааччы Евгений Афанасьев: Спортивнай тутуулар Таатта улууһун дьонугар-сэргэтигэр элбэх спортсменнары, үрдүк таһаарыылары аҕаллын.
Долгутуулаах түгэҥҥэ СӨ Тутууга министиэристибэтин аатыттан Ытык Таатта дьонугар-сэргэтигэр, бэтэрээннэргэ көмүс акылаат түспүт бэлиэ күнүнэн истиҥник эҕэрдэтин тиэрдэн туран, Таатта улууһугар 4 млрд. солк. кэриҥэ сууммалаах баараҕай тутуулар саҕаламмыттарын: тутулла турар 1,5 млрд. солк. 100 миэстэлээх интэринээттээх, 450 миэстэлээх үөрэх кыһата, 1 млрд. солк. поликлиника, 1 млрд. солк. элбэх хайысхалаах спортивнай комплекс, 400 мөл. солк. 1000 миэстэлээх стадион тутуута СӨ Ил Дархана Айсен Николаевтан, СӨ Бырабыыталыстыбатын бэрэссэдээтэлэ Сергей Местниковтан улахан болҕомто ууруллан, Таатта улууһун сайдыытыгар күүс-көмө, улахан олугунан буолбутун тоһоҕолоон бэлиэтээтэ.
«Монтажник» ПК салайааччыта Александр Ханин: Спортивный комплекс, стадион – это роскошь для нашего района. Берегите, занимайтесь, побеждайте!
Таатта улууһугар улахан тутуулар ыытыллар үөрүүллээх күннэринэн истиҥ эҕэрдэтин тиэртэ.
Историческай суолталаах үөрүүлээх түгэҥҥэ СӨ физическэй култуура уонна спорт миниистирин солбуйааччы Гаврил Мохначевскай СӨ спорт хамсааһынын 100 сылынан чөл олоҕу пропагандалыыр, өр сылларга спорт хамсааһыныгар үтүө суобастаах үлэтин иһин, чэпчэки атлетикаҕа үгүс өрөспүүбүлүкэтээҕи күрэс кыайыылааҕа Дмитрий Дедюкиҥҥа спорт бэтэрээнэ үрдүк ааты иҥэрдэ. Саха сиригэр физическэй хамсааһын төрүттэммитэ 100 сыллаах үбүлүөйдээх бэлиэни СӨ спордун бэтэрээннэрэ Семен Ючюгяевка уонна Анатолий Муруновка үөрүүлээх быһыыга-майгыга туттарда.
Элбэх функциялаах спортивнай комплекс үйэлээх акылаатын уурууга Үрдүкү салалтаны, тутааччыны кытта 95 саастаах Ытык киһибит Дмитрий Дедюкин уонна Семен Ючюгяев көхтөөхтүк кыттан, сэмэй кылааттарын киллэрсэн, долгутуулаах тэрээһин үөрүүтүн үрдэттилэр.
Баараҕай тутуу сүрүн түһүмэҕэ 2024 сылга ыытыллан, 2025 сыллаахха аһыллан, үлэҕэ киириэҕэ.
Мария Павлова.