«Таатта улууһа” Муниципальнай оройуон Аҕа баһылыгынан талыллыбыт Айаал Бурцев дуоһунаска киирэр сиэрэ-туома Былатыан Ойуунускай аатынан Таатта норуодунай тыйаатырыгар сэтинньи ый 4 күнүгэр буолан ааста.
Балаҕан ыйын 8-10 күннэригэр ыытыллыбыт быыбардар түмүктэринэн, Таатта улууһун баһылыгар Айаал Бурцев быыбардааччылар 57,5 % куоластарын ылбыта.
Үөрүүлээх тэрээһин быыбар хамыыһыйатын бэрэссэдээтэлэ Агафия Ефимова саҥа талыллыбыт улуус Аҕа баһылыгын эҕэрдэлээтэ уонна удостоверениетын туттарда. Таатта улууһун баһылыгар киирэр сиэри-туому улуус дьокутааттарын Сэбиэтин бэрэссэдээтэлэ Петр Максимов оҥордо. Саҥа талыллыбыт «Таатта улууһа” МО баһылыга СӨ Төрүт сокуонугар олоҕуран, «Таатта улууһа” МО баһылыгын эбээһинэһин үтүө суобастаахтык толоруом, СӨ Конституциятын уонна сокуоннарын, норуотун интэриэһин көмүскүөм диэн «Таатта улууһа» МО Устаабыгар илиитин ууран туран Андаҕарын сахалыы уонна нууччалыы тылларынан эттэ. Ол кэнниттэн улуус дьокутааттарын Сэбиэтин бэрэссэдээтэлэ Петр Максимов, баһылык түөскэ кэтэр мэҥэ бэлиэтин үөрүүлээх быһыыга-майгыга кэтэртэ.
Айаал Семенович улууспут чэчирии сайдарыгар суолу салайыам, эдэр ыччат төрөөбүт дойдутугар олохсуйарын, олох-дьаһах хаһаайыстыбатын сайдарын туһугар, дьон-сэргэ айар-тутар, үлэлиир-хамсыыр күүһүн түмэн, биир сомоҕо буоларбыт туһугар үлэлиэм-хамсыам диэн олохтоохторугар мэктиэ тылын биэрдэ.
Инаугурация алгыһын саҥа талыллыбыт баһылыкка анаата, тойугунан күндүлээтэ биир дойдулаахпыт, алгысчыт Виталий Очиров.
Улуус баһылыгар Саха Өрөспүүбүлүкэтин Ил Дарханын сүбэһитэ, СӨ норуотун хаһаайыстыбатын үтүөлээх үлэһитэ, Таатта улууһун бочуоттаах олохтооҕо Георгий Дмитриевич Никонов СӨ Ил Дархана Айсен Сергеевич Николаев эҕэрдэтин туттарда, бэйэтин баҕа санаатын, кэскиллээҕи, үйэлээҕи тэрийэригэр эттэ.
Ыаллыы сытар Чурапчы улууһун баһылыга, олохтоох бэйэни салайыныы сүбэтин салайааччыта Степан Саргыдаев саҥа улуус баһылыгын Айаал Бурцевы истиҥник эҕэрдэлээтэ, төрөөбүт норуоппут маанылаах иһитин – чороону бэлэх уунна. Олохтоох бэйэни салайыныы сүбэтин аатыттан «Таатта улууһа” МО 2013-2023 сылларга баһылыгынан үлэлээбит Михаил Михайлович Соровка махтанна уонна сүбэ аатыттан наҕараада туттарда.
Салгыы бэлиэ күн ыалдьыттара, нэһилиэк баһылыктара, улууспут тумус туттар дьоно, үрдүк таһаарыылаах, үтүө түмүктэрдээх үлэни баҕаран, ытыс дохсун тыаһыгар доҕуһуоллатан «Таатта улууһа” МО баһылыгын Айаал Бурцевы эҕэрдэлээтилэр.
Елена Слепцова.