Арассыыйа Бэрэсидьиэнэ Владимир Путин видеосибээс нөҥүө Арассыыйа эрэгийиэннэригэр саҥа тутуллубут уонна төрдүттэн (капитальнай) өрөмүөннэммит эбийиэктэри арыйыы үөрүүлээх тэрээһинигэр кыттыыны ылла. «Биһиги сыалбыт: дойдубут хас биирдии эрэгийиэнигэр, кыра куораттарга уонна бөһүөлэктэргэ, дьон-сэргэ үрдүк таһымнаах аныгы мэдиссиинэ көмөтүнэн хааччыйалларыгар туһуланар», – диэн Арассыыйа Бэрэсидьиэнэ Владимир Путин иһитиннэрдэ.
Олортон биирдэстэринэн Таатта улууһун Ытык Күөлүгэр «Доруобуйа харыстабыла» национальнай бырайыак чэрчитинэн тутуллубут саҥа үс этээстээх, 4000 кв.м. иэннээх, күҥҥэ 200 киһини көрөр кыахтаах поликлиника сэтинньи 28 күнүгэр үөрүүлээх быһыыга-майгыга үлэҕэ киирдэ.
Үөрүүлээх тэрээһиҥҥэ СӨ Ил Дархана Айсен Николаев, СӨ доруобуйа харыстабылын миниистирэ Лена Афанасьева, Таатта улууһун баһылыга Айаал Бурцев, Таатта улууһун киин балыыһатын сүрүн бырааһа Сардана Кононова кытыннылар. СӨ Ил Дархана Айсен Николаев эҕэрдэ этиитигэр «Улуус дьоно-сэргэтэ күүппүт поликлиниката үлэҕэ киирдэ. Урукку өттүгэр хас да сиринэн тарҕанан үлэлээн олорбуттара. Төһө да доруобуйа харыстабылыгар үлэлиир дьон, дьоҥҥо кыһаллыбыттарын, көрө-истэ сатаабыттарын иһин, син биир саҥа ирдэбилгэ эппиэттээбэт этэ. Арассыыйа Бэрэсидьиэнэ Владимир Путин дойду үрдүнэн «Доруобуйа харыстабыла” национальнай бырайыага үлэлээн, улахан куораттарга эрэ буолбакка, тыа сиригэр тиийэ балыыһа комплекстара тутуллаллар. Саха сирин улуустарыгар доруобуйа харыстабылыгар 14 балыыһа комплекса тутулла турар. Биир кэмҥэ маннык элбэх мэдиссиинэ тэрилтэтэ өрөспүүбүлүкэ оройуоннарыгар тутуллубута устуоруйаҕа суоҕа. Бу тутуулар бары аныгы тэрилинэн толорулар, киин сирдэр балыыһаларыттан итэҕэһэ суохтар. Хара саҕаланыаҕыттан улуус поликлиникатын тутуута, мин тус хонтуруолбар сылдьыбыта. Биһиги туруоруммут сорукпутун ситистибит. Поликлиника аныгы ирдэбилгэ барытыгар толору эппиэттиир компьютернай томографка тиийэ хааччыллан, таҥыллан, үлэни саҕалыырга бэлэм буолла. Өрөспүүбүлүкэҕэ мэдиссиинэ бастыҥ тэрилтэтинэн буолуоҕа», – диэн бэлиэтээтэ Ил Дархан уонна улуус олохтоохторугар, мэдиссиинэ үлэһиттэрин саҥа поликлиника үлэҕэ киирбитинэн эҕэрдэлээтэ. Кини балыыһа кэллэктиибигэр суһал көмө массыынатын сэртипикээтин туттарда. Өрөспүүбүлүкэ аатыттан Арассыыйа Бэрэсидьиэнэ Владимир Путиҥҥа кыһамньытын уонна өйөбүлүн иһин махтанна.
Таатта улууһун баһылыга Айаал Бурцев бэйэтин этиитигэр өр сылларга кэтэспит поликлиникабыт үлэҕэ киирбитинэн СӨ Ил Дархана Айсен Николаевка, СӨ Бырабыыталыстыбатыгар махтанна. Тутууну ыыппыт «Монтажник» ПК салайааччы Александр Ханиҥҥа, өссө эбии улууска үс улахан тутууну үлэҕэ киллэриэҕэ диэн эрэлин биллэрдэ. Саҥа поликлиника күлүүһүн «Монтажник» ПК салайааччыта Александр Ханин киин балыыһа сүрүн бырааһыгар Сардана Кононоваҕа дохсун ытыс тыаһынан туттарда.
Ытык Күөлгэ аһыллыбыт саҥа поликлиника нэһилиэнньэни хаачыстыбалаах мэдиссиинэ өҥөтүнэн хааччыйыаҕа. Киирэр аантан саҕалаан аһаҕас офистар үлэлиэхтээхтэр. Поликлиника аныгы комплекса “кыһамньылаах поликлиника” саҥа ирдэбилинэн учуоттаан тутулунна. Испэсэлиис быраастар кэбиниэттэрин сэргэ көмпүүтэр томографтаах, рентгеннээх, УЗИ-лаах, ФГДС-таах диагностика отделениетыгар, функциональнай диагностика кэбиниэтигэр, күнүһүн эмтэнэр палааталаах. үлэлиэхтэрэ.
Поликлиникаҕа саҥа технологиялары, профилактика, эмтээһин саҥа көрүҥнэрин киллэриигэ аныгы ирдэбиллэргэ эппиэттиир оборудованиелар туруоруллубуттар: 16 срезтаах компьютернай томография, цифровой рентгент аппарат, малодозовай цифровой флюорограф «ПроСкан», рентгент маммограф аппарат, мурун иһин чинчийэр ультразвуковой сканер-эхосинускоп уонна атын медицинскай тэриллэр. Маны барытын анал үрдүк үөрэхтээх испэсэлиистэр иилээн үлэлэтиэхтэрэ.
«Земскэй доктор» бырагыраамма сүнньүнэн быйыл 5 быраас, ол иһигэр отоларинголог, хирург, фтизиатр, 2 терапевт быраас үлэлиэхтэрэ. Онтон 2 быраас клиническэй ординатураны бүтэрэн кэлбиттэр. Кэнники сылларга «Земскэй доктор» бырагыраамма нөҥүө 48 исписэлиис үлэлии кэлбит.
Саха сирэ Уһук Илиҥҥэ оҕо төрөөһүнүгэр инники күөҥҥэ сылдьар. Таатта улууһун көрдөрүүтэ Саха сирин орто көрдөрүүтүттэн 17% үрдүк. Ааспыт сылга Тааттаҕа 200-н тахса оҕо төрөөбүтэ, улуус нэһилиэнньэтэ орто көрдөрүүтэ 61,8% диэри үрдээбит.
«Биһиэхэ үөрүүлээх, долгутуулаах күммүт үүннэ. Саҥа үлэҕэ киирбит поликлиника улууспут олохтоохторугар хаачыстыбалаах мэдиссиинэ көмөтүн оҥоруоҕа. Поликлиникабыт аныгылыы тэрилинэн диагностикалыырга уонна үрдүк таһымнаах эмтэниини ааһарга туһуланна», — диэн улуус киин балыыһатын сүрүн бырааһа Сардана Кононова бэлиэтээтэ уонна кэлбит ыалдьыттары экскурсияҕа ыҥырда.
Елена Слепцова.