Үлэ бырааһынньыгын көрсө Саха Өрөспүүбүлүкэтин Ил Дархана Айсен Николаев олохтообут «Үлэ киһитэ» анал бириэмийэтин оройуоннааҕы киин балыыһа ультразвуковой диагностикатын бырааһа Изабелла Николаевна Макарова, «Таатта Дальнобой» уопсастыбаннай түмсүү салайааччыта Никифор Леонтьевич Кутугутов, «Арктик Телеком» АУо уонна Таатта оройуонунааҕы телевидение сибээһин ситимин салайааччыта Иван Иванович Барбасытов ылар чиэстэнэн, 300 тыһ. солк. наҕараадаланнылар.
Үлэ киһитэ бар дьоҥҥо оҥорбут үтүмэн үгүс үтүөтүнэн, кэскиллээҕи кэҥэппитинэн, үйэлээҕи оҥорбутунан үтүө аата сыаналанар.
Изабелла Николаевна Макарова: Эмчит дьон олоҕун араҥаччылыыр аналлаах.
Изабелла Николаевна 1981 сыллаахха СГУ мэдиссиинэ факультетын бүтэрэн, Покровскайга интернатураны ааспыта. 1982 сылтан Дьүлэй нэһилиэгин участковай балыыһатын кылаабынай бырааһынан үлэтин саҕалаабыта. Кэлин 12 сыл устата подростковай терапевынан таһаарыылаахтык үлэлээбитэ. Мэдиссиинэ төһүү үлэһитэ 1993 сыллаахха өрөспүүбүлүкэтээҕи балыыһаҕа ультразвуковой диагностика бырааһыгар эбии үөрэнэн, идэтин толору баһылаан, ол кэмтэн подростковай терапевынан уонна УЗИ бырааһынан үлэлээбитэ. Арассыыйа Бэдэрээссийэтин уонна Саха Өрөспүүбүлүкэтин доруобуйатын харыстабылын туйгуна, «Барҕарыы» пуонда стипендиата, Таатта улууһун Бочуоттаах олохтооҕо 2000 сылтан оройуоҥҥа аҥардас УЗИ бырааһынан үлэлээбитэ 31 сыла үүннэ.
Никифор Кутугутов: Төрөөбүт түөлбэбит, нэһилиэкпит, улууспут сайдарын туһугар түмсүүлээх буолуохха!
Никифор Леонтьевич суоппар идэтин олох аргыһа оҥостор дьылҕата таайан, үрдүкү кылааска үөрэнэр эрдэҕиттэн «Автодело» куруһуогугар сылдьан, оскуоланы правалаах бүтэрбитэ. Аҕатын туйаҕын хатаран, 1987 сыллаахха Таатта нэһилиэгин Райпотугар суоппарынан үлэлии киирбитэ. Бастыҥ суоппар 1989 сылга «Е» категорияны ылан, Нерюнгри, Алдан, Большой Невер курдук ыраах сиргэ айана саҕаламмыта. Эргиэн эйгэтин төһүү үлэһитэ уопсайа 18 сыл райпо суоппарынан таһаарыылаахтык үлэлээбитэ. Үһүс көлүөнэ эрэллээх суоппара 2005 сылтан урбаанньыт буолан, улахан кыамталаах массыынанан таһаҕас таһыытыгар үлэлиир. Таатта улууһун социальнай-экономическай сайдыытыгар сүҥкэн өҥөлөөх Арассыыйатааҕы автотранспорт Бочуоттаах үлэһитин көҕүлээһининэн ыраах айан суоппардарын түмсүүтүн тэрийбитэ, өрөспүүбүлүкэҕэ бастакы дальнобойдар ыһыахтара ыытыллыбыта, Тааттаҕа «Алгыстаах айан» искибиэр оҥоһуллубута, кинигэ бэчээттэммитэ. Ф.К. Попова аатынан «Сердце патриота» Бочуоттаах бэлиэ хаһаайынын тэрийиитинэн нэһилиэккэ, улууска, өрөспүүбүлүкэҕэ «Тааттадальнобой» түмсүү кэскиллээҕи кэрэһэлиир, үйэлээҕи үксэтэр үлэтин эйгэтэ кэҥии турара барыбытын үөрдэр.
Иван Иванович Барбасытов: Үлэ кэллэктиибин күүһэ – түмсүүгэ.
«Арктик Телеком» АУо уонна Таатта оройуонунааҕы телевидение сибээһин ситимин салайааччыта Иван Иванович Барбасытов 44 сылын сибээс эйгэтигэр айымньылаахтык үлэлиир. Үлэтигэр бэриниилээх, баай үөрүйэхтээх үлэһит телерадиомеханик уонна инженер идэтиттэн саҕалаан, салайар үлэһиккэ тиийэ үүммүтэ. СӨ сибээһин үтүөлээх үлэһитэ, «Бочуоттаах радист» анал бэлиэ хаһаайына олох хаамыытын кытта тэҥҥэ оройуон сайдыытыгар аныгы технологияны сайыннарыыга эҥкилэ суох кылааты киллэрсэр. Бастыҥ маастарыстыбалаах үлэһит, мындыр салайааччы үүнэр ыччакка, биир идэлээхтэригэр идэтин толору баһылаабыт үлэһит быһыытынан үтүө холобур буолар.
Мария Павлова.