Биһиги улууска ойуур баһаара билиҥҥитэ этэҥҥэ бэлиэтэнэ илик даҕаны, улаханнык саҥарбаппыт, чугастыы улууска Амма Наахаратыгар улахан баһаар баара биллэр. Халыма эҥэр эмиэ улахан баһаардар турбуттарын истэбит. От ыйын 18 күнүнээҕи чахчынан 119 тыа баһаара 602 тыһ. га иэннээх тыа умайар диэн суруйаллар. Бу күөх суугун тайҕабыт умайа турар улуустарыгар ыксаллаах быһыы-майгы режимэ биллэриллэн, дьон-сэргэ тыаҕа ураты сэрэхтээх сылдьара эрэйиллэр.
Ойуур баһаардарын бохсууга өрөспүүбүлүкэ үрдүнэн күүстээх үлэ бара турар. СӨ САУо «Якутлесресурс» Тааттатааҕы филиалын салайааччыта Андрей Дмитриевич Данилов иһитиннэрбитинэн кини үлэһиттэрэ икки бөлөҕүнэн Өймөкөөн, Томпо, билигин Алдан улууһугар көмөҕө тиийэн сылдьаллар. Бастакы 6 киһилээх бөлөҕү Большаков Назар Петрович салайар, иккиһи 8 киһини Борисов Владимир Владимирович салайан илдьэ сылдьар. Бу иккис бөлөх дьоно билигин Амма улууһугар тиийэн уоту умуруорууга үлэлииллэр.
Оттон Тааттатааҕы «Авиалесохрана» тэрилтэ начальнига Аркадий Борисович Жуков сырдаппытынан быйыл аҥаардас бу ыйга тэрилтэ Өймөкөөн, Чурапчы, Алдан, Амма, Уус Маайа улуустарыгар уонна бэйэбит улууспутугар барыта 18 баһаары туораппыт. Ити сыралаах үлэҕэ кыттыыны ылбыт 28 киһи — десантниктар, парашютистар — ханна тиийбит сирдэригэр эҥкилэ суох сорудаҕы толорон, үлэлэрэ үчүгэйинэн сыаналаммыт. Бүгүҥҥү күҥҥэ уопуттаах инструктордар И.В.Дьяконов, А.А.Уранаев, И.Г.Вырдылин салалталарынан 16 десантник Амма улууһуттан баһаары бохсон кэлэр. Аар айылҕабытын бука бары харыстыаҕыҥ!
Автор: А. Неустроева