Уус Таатта орто оскуолатыгар ыытыллыбыт СӨ үөрэнээччилэрин Хотугу многоборьеҕа бастыыр иһин күрэс
Н.Д. Неустроев аатынан Уус Таатта орто оскуолатыгар 2024 сыллаах Саха Өрөспүүбүлүкэтин үөрэнээччилэрин хотугу многоборьеҕа бастыыр иһин уонна биирдиилээн, хамаанданан кыайыы иһин «2024 сыл Спортивные Якутяне» өрөспүүбүлүкэтээҕи үөрэнээччилэр спартакиадалара буолла. Үһүс күҥҥэ сарсыардаттан наартаны ойуу күрэхтэһиитэ 11-р уонна онтон кыра саастаах оҕолорго оскуола спортивнай саалатыгар саҕаланна. Онтон 12-13, 14-15, 16-17 саастаах оҕолорго Алдан эбэҕэ аркааны быраҕыыга күөн көрүстүлэр.
Бу күн Таатта улууһун Алдан нэһилиэгин тыа сирин түөлбэтэ, Николай Денисович Неустроев аатынан Уус-Таатта орто оскуолатын педагогическай коллектива ыраахтан кэлбит ыалдьыттары — Саха Өрөспүүбүлүкэтин Ил Түмэнин Хоту сир төрүт олохтоох аҕыйах ахсааннаах омуктарын боппуруостарыгар уонна Арктика дьыалаларыгар сис кэмитиэтин Бэрэссэдээтэлин, Саха Өрөспүүбүлүкэтин Хотугу многоборьетын Федерациятын Президенын — Голоморева Елена Христофоровнаны уонна «Арктика суоллара Саха Өрөспүүбүлүкэтин хаһыанай тэрилтэтин Генеральнай дириэктэрин солбуйааччы, Саха Өрөспүүбүлүкэтин Ил Түмэнин Хоту сир төрүт олохтоох аҕыйах ахсааннаах омуктарын боппуруостарыгар уонна Арктика дьыалаларыгар сис кэмитиэтин норуодунай дьокутаатын — Сивцев Сергей Афанасьевиһы саха сиэринэн кырылыы оонньуур кымыһынан, саха сайылыгын санатар алаадьынан утары уунан көрүстүлэр.
Ыалдьыттары көрсүү кэнниттэн Хотугу многоборье Федерациятын отчуоттуур уонна быыбардыыр конференцията буолла. Конференция түмүгүнэн Хотугу многоборье федерациятын Президенынан Саха Өрөспүүбүлүкэтин Ил Түмэнин Хоту сир төрүт олохтоох аҕыйах ахсааннаах омуктарын боппуруостарыгар уонна Арктика дьыалаларыгар сис кэмитиэтин норуодунай дьокутаата — Сивцев Сергей Афанасьевич талылынна.
Николай Денисович Неустроев аатынан Уус Таатта орто оскуолатын «Бастыҥнар хамсааһыннара» первичнэй отделения, «Аргыс» оҕо хамсааһын активистара, кэлбит ыалдьыттартан, судьуйалартан, күрэх кыттыылаахтарыттан интервью ыллылар. Ол курдук күрэх кэмигэр күүтүүлээх ыалдьыттыын, Голоморева Елена Христофоровналыын, үөрэнээччилэр лидердара Алена Колодезникова кэпсэтии ыытта. Кэпсэтиигэ Елена Христофоровна Хотугу норуоттар үгэстэрин сайыннарыыга ханнык үлэлэр ыытыллалларын, Хотугу многоборье ханнык улахан түһүлгэлэргэ спорт быһыытынан киирбитин, Хотугу эргимтэ Федерациятын инники сайдыыта хайдах буолуохтааҕын уонна бу Таатта улууһун Уус Таатта оскуолатыгар Хотугу многоборье үһүс төгүлүн ыытылларын туһунан сиһилии сырдатта.
Онтон Саха Өрөспүүбүлүкэтин Хотугу многоборьеҕа Федерациятын толорооччу директора, Саха Өрөспүүбүлүкэтин үөрэҕириитин уонна физическай култууратын туйгуна, бастакы категориялаах судьуйа Семен Михайлович Колодезников бэйэтин интервьютугар Хотугу многоборьеҕа хас сыллаахтан үлэлиирин, күрэх муҥутуур ситиһиилэрин, тэрээһин хайдах ыытылла турарын уонна эһиил ханна буолуон сөбүн туһунан санаатын үллэһиннэ.
Горохов Данил Эбээн-Бытантай национальнай улууһун Р.И. Шадрин аатынан Саккырыыр орто оскуолатын 10 кылааһын үөрэнээччитэ, оскуолаҕа саамай сөбүлүүр предметэ физкультура буоларын туһунан кэпсээтэ. Данил оскуоланы бүтэрдэҕинэ МЧС үлэһитэ буолуон баҕарарын биллэрдэ. Хотугу многоборьенан быйыл саҥа дьарыктанан саҕалаабыт, биэс көрүҥүттэн үстэ төхтүрүйэн ыстаныыны ордорбут. Кинини Иннокентий Егорович Колесов дьарыктыыр. Уус Таатта орто оскуолатыгар тэрээһин үрдүк таһымнаахтык бара турарын, күрэхтэһээччилэр бэлэмнээхтэрин бэлиэтээтэ. Данил күрэххэ бастыыр туһугар спортсменнар дисциплинированнай уонна бэйэ-бэйэлэригэр убаастабыллаах сыһыаннаах буолуохтаахтар диэн чопчулаан эттэ.
Онтон Ньурба улууһун Сэбиэскэй союз дьоруойа Н.Н. Чусовской аатынан Антоновка орто оскуолатын 8 кылааһын үөрэнээччитэ Петров Элан хотугу многоборьенан үһүс сылын дьарыктанар эбит. Кини Хотугу многоборье СӨ 2023с. сыллаах призера, тренера Васильев Илья Григорьевич. Элан ордук наартаны ыстаныыны ордорор. Онтон оскуолаҕа информатика, физика, химия уонна физкультура предметтарыгар сөбүлээн үөрэнэр.
И.Н.Гуляев аатынан Дьүлэй орто оскуолатын 8 уонна 10 кылааһын үөрэнээччилэрэ Прокопьева Айгуль уонна Никитина Аэлита хотугу многоборьеҕа Таатта улууһун сүүмэрдэммит хамаандатыгар талыллан улуустарын аатын көмүскүү сылдьаллар. Күрэххэ кыттаргытыгар туох ыарахаттары көрүстүгут диэн ыйытыыга, дойдуларын, дьоннорун ахталларын кэпсээтилэр. Кинилэр Уус Тааттаҕа күрэх буолуон икки нэдиэлэ иннинэ кэлбиттэр. Айгуль ордук сүүрүүнү сэҥээрбит, онтон Аэлита аркааны быраҕыыны ордорбут.
Николай Денисович Неустроев аатынан Уус Таатта орто оскуолатын 8 уонна 9 кылааһын үөрэнээччилэрэ Егасов Валентин уонна Гуляев Володя маннык улахан күрэхтэһии төрөөбүт нэһилиэктэригэр үһүс төгүлүн ыытылла турарыттан үөрэллэр. Биир дойдулаахтара, аймахтара, төрөппүттэрэ, бииргэ үөрэнэр доҕотторо күрэх хаамыытын кэлэн көрөллөрүттэн астыналларын кэпсээтилэр.
Үһүс күн үс төгүл үс ыстаныы, аркаан быраҕыытын уонна мастаах сүүрүү кыайыылаахтарын наҕараадалааһынынан түмүктэннэ.
Уус Таатта орто оскуолатын медиа киинэ