Ахсынньы 25 күнүгэр «Таатта улууһа” МО баһылыга Айаал Бурцев улуус олохтоохторун кытары “Вконтакте” социальнай ситимҥэ «Таатта улууһа” муниципальнай оройуон официальнай страницатыгар быһа эпииргэ тахсан боппуруостарга эппиэттээтэ.
Аҕа баһылык улуус олохтоохторун кэлэн иһэр Саҥа 2024 сылынан эҕэрдэлээтэ, кэлэр сыл ситиһиилээх буоларыгар баҕарда. Арассыыйа Бэрэсидьиэнэ Владимир Путин, бэйэтин аһаҕас эпииригэр кэлэр 2024 сылы – Дьиэ кэргэн, СӨ Ил Дархана Айсен Николаев Анал этиитигэр Оҕо саас сылынан биллэрбиттэрин өйөөн, кэлэр сылы баһылык улууска Эрэл. Итэҕэл, Таптал. сылынан биллэрдэ. Кини дьиэ кэргэн көмүскэллээх буолуутун, төрүт үгэстэри харыстыыр, тарҕатар, айар-тутар кыаҕын көҕүлүүр, уйгулаах, эйэлээх олоҕу тэрийии, чөл олоҕу өрө тутар сыаллааҕын биллэрдэ.
Айаал Семенович баһылык буолан олоруоҕуттан биир сүрүн хайысхатынан 2024 сылга тыырыллар бюджеты үөрэтии, бигэргэтии, ылыныы үлэтигэр күүскэ үлэлэһэрин туһунан кылгастык кэпсээтэ.
“Вконтакте” социальнай ситимҥэ барыта 126 улуус олохтоохторо холбоммуттарын, кэлэр сылга маннык эпиирдэри куруук ыыта туруохтарын эттэ.
Быһа биэриигэ Аҕа баһылыкка тыа хаһаайыстыбата, үөрэх, доруобуйа, «Манчаары оонньууларыгар” бэлэм, тутуу, суол, бэдэрээлинэй, өрөспүүбүлүкэтээҕи, муниципальнай сыаллаах бырагырааммаларыгар үлэлэһии, олох-дьаһах хаһаайыстыбатыгар уо.д.а. кыһалҕалаах боппуруостар бэрилиннилэр. Олортон быһа тардан:
Парасковья Татаринова: Чөркөөххө Былатыан Ойуунускай аатынан култуура дьиэтэ хаһан үлэҕэ киириэй?
- Чөркөөххө Былатыан Ойуунускай аатынан культурнай спортивнай комплекс тутуута саҕаланан, кэмигэр бүтүөхтээҕэ. Бу тутуу «Демография» национальнай бырайыак чэрчитинэн, «Бизнес-спринт (Я выбираю спорт)» федеральнайдааҕы тосхолунан тутуллар. Госэкспертизаны ааһан 51 мөл.солк үлэ ыытыллыбыта эрээри бэдэрээччит мөлтөҕүттэн тутуу хаамыыта турар. СӨ Ил Дархана Айсен Николаев быйылгы Анал этиитигэр Саха Автономиятын төрүттэспит государственнай-политическай, общественнай деятель П.А.Ойуунускай төрөөбүт дойдутугар 2024 сыллаахха култуура дьиэтэ үлэҕэ киириэ диэн эппитэ.
Дмитрий Барбасытов: 2025 сылга диэри “Халыма” бэдэрээлинэй суола Чурапчыттан Ытык Күөлгэ диэри аспаалланыа дуо?
- “Халыма” бэдэрээлинэй суола биэс этаабынан тутуута ыытыллар. Бастакы этаабын куонкуруһа бэриллэн, заказчик үлэтин саҕалыа диэн эрэнэбит. “Бүлүү” суолун тэрилтэтэ “Бүлүү” уонна “Халыма” массыына суоллара 2025–2030 сс. сайдар бырагыраамаларын бэлэмнээн көмүскээтэ. “Халыма” суолугар үлэ бигэргэммит былаанынан көрүллүбүт үбү көдьүүстээхтик туһанан, түргэн тэтиминэн барарын күүтэбит.
Анна Жараева: Амма нэһилиэгэр саҥа ититии ситимэ үлэтин билиһиннэриэххит дуо? Үлэҕэ хаһан киирэр, ситэри оҥоһуллубатах теплотрасса салҕаныа дуо?
- Дьохсоҕон уонна Амма нэһилиэктэригэр хочуолунайдар тутуулара бэдэрээлинэй бырагыраамманан тутуллаллар. ОДьКХ улуустааҕы салаатын дириэктэрэ Василий Будикин Амма нэһилиэгэр саҥа хочуолунай дьиэтин иһэ сылыйбытын, тутуу үлэтэ бара турарын иһитиннэрбитэ. Онон бу аҕыйах хонугунан хочуол үлэҕэ киириэхтээх. Тардыллыбыт теплотрассалары халлаан сылыйдаҕына үлэҕэ киирэри былаанныыбыт.
Биир чаас устата Айаал Семенович киирбит боппуруостарга эппиэт биэрдэ, ситэ эппиэттээбэтэх боппуруостарыгар суругунан эппиэти биэрэри мэктиэлээтэ.
Елена Слепцова.