“Таатта улууһа” МО баһылыга Айаал Бурцев дьаһалта 2023 сыллаах үлэтин отчуота нэһилиэктэринэн буолан ааста. Отчуоттуур бөлөххө улуус араас хайысхаҕа үлэлиир салайааччылара сыллааҕы үлэни-хамнаһы отчуоттаатылар, олохтоохтор үгүс ыйытыыларыгар хоруйдаатылар.
Октябрьскай нэһилиэк
Улуус баһылыга Айаал Бурцев кылгас киирии тылын кэннэ олохтоохтор биир тирээн турар ыйытыктарынан – бэдэрээлинэй бырагыраамма сүнньүнэн элбэх функциялаах успуорт саала, Былатыан Ойуунускай аатынан култуура киинэ, «Хаарбах дьиэттэн саҥа дьиэҕэ көһүү» бырагыраамма чэрчитинэн 10 кыбартыыралаах уопсай таас дьиэ тутуутун үлэлэрин ыйыттылар.
Олохтоохтор эбийиэктэр, чааһынай дьиэлэр ОДьКХ квартальнай хочуолунайа төһө да хочуол толору үлэлии турдар, дьиэлэр биллэ тымныйбыттарын, хочуолларыгар өрөмүөн үлэтэ барарын иһитиннэрдилэр. Илин эҥэр түөлбэ олохтоохторо ититии ситимигэр холбонууну туруорустулар. Ыйытыыга улуустааҕы ОДЬКХ салайааччыта Василий Будикин лоп – бааччы хоруйдаата.
Олохтоохтор тыа хаһаайыстыбатыгар үс нэһилиэктэн турар кэпирэтиип үлэтин сырдаталларыгар, саха уонна боруода ынаҕы дэлэтии, оттуур сир дулҕатын астарарга, нүөлсүтүү үлэтин ыытарга, кормовой базаны туттарарга тула кэпсэтии ыытылынна. Быһыты тутуу боппуруоһа турбута балачча өр буолла. Маны сэргэ нэһилиэнньэ орто сааһа сааһырбытын, үлэ миэстэтин таһааран ыччаты олохсутууга, автозаправочнай станцияны сөргүтүү, халаан уутугар эмсэҕэлээбит музей күрүөтүн тутуу боппуруостарыгар кэккэ эппиэттэри ыллылар.
Октябрьскай нэһилиэк олохтоохторо улуус баһылыгын отчуотун сөптөөҕүнэн сыаналаатылар.
Дьохсоҕон нэһилиэгэ
Нэһилиэнньэ тыҥаан турар тыын суолталаах боппуруостары туруоруста. Ол курдук, А.Е.Кулаковскай – Өксөкүлээх Өлөксөй аатынан Дьохсоҕон орто оскуолата аварийнай туругунан сабыллан, атын эбийиэктэргэ үөрэх ыытылла турарынан оскуола тутуутун, «Зал борьбы», таһырдьа аһаҕас халлаан анныгар дьарыктанар киин бырайыактардарын туоһуластылар.
«Таатта» түөлбэ ититии ситимин холбонуутугар, квартальнай хочуолунай үлэҕэ киириитин, тыа хаһаайыстыбатыгар кэпирэтиип үлэтигэр барытыгар туһааннаах салайааччылартан эппиэт ылан нэһилиэк олохтоохторо астынан – дуоһуйан тарҕастылар.
Түмүккэ, Дьохсоҕон нэһилиэгин олохтоохторо улуус баһылыгын отчуотун сөптөөҕүнэн аахтылар.
Елена Слепцова.