Бүгүн атырдьах ыйын 14 күнүгэр Тааттабыт улууһа сарсыардаттан буруо.
Таатта улууһун лесничэйэ Петр Уранаев иһитиннэрбитинэн: улууска ойуур уота бэлиэтэммэт. Буруо тыал хайысхата уларыйдаҕына эрэ намтыа. Онтон, “Планета” билим чинчийэр киинэ куйаартан устубут хаартыскатыгар көстөрүнэн, Хабаровскай кыраай, Амур уобалаһын уонна Уус Маайа улууһун баһаардарын буруота илинтэн кэлэр салгын сүүрээнигэр холбоһон, Саха сирин соҕуруу, соҕуруулуу-илин уонна киин өттүгэр киэҥник, хойуутук сабардаата.
Бүгүҥҥү туругунан, өрөспүүбүлүкэҕэ 127 ойуур уота 366 883,3 гектардаах сиргэ умайар. Ол курдук, саамай элбэх ойуур тыата Өлүөхүмэҕэ уонна Уус Маайаҕа улуустарыгар күүдэпчилэнэр.
Ааптар: Елена Слепцова