Сыл ахсын Анапа куоракка Бүтүн сойуустааҕы спортивнай оонньууга саха норуотун бастыҥ спортивнай көрүҥэ — мас тардыһыыта киирэр улахан күрэһэ ыытыллар. В.И. Ленин аатынан Уолба орто оскуолатын мадьынылара сыллата спортивнай оонньууга ситиһиилээхтик кытталлар. Быйылгы спортивнай оонньууга тренербит Артаньян Макарович Неустроевы кытта түөрт иитиллээччи Анапаҕа баран алта күн устата олус үчүгэйдик кыттан кэллибит. Күрэскэ Сахабыт сириттэн Таатта, Томпо, Нам, Уус Алдан, Горнай улуустарыттан оҕолор кэлэн, атын дойду мадьыныларын кытары күөн көрүстүлэр. Спортивнай оонньуу Витязево куоракка баар улахан оҕо спортивнай комплексыгар ыытылынна.
Күрэс ыытыллар сирэ биһиги түспүт гостиницабытыттан чугас этэ. Онно Томпо улууһун оҕолорун кытта биир хоско олорон, ыкса билсэн, элбэх чугас доҕоттордоннубут. Күрэхтэһии түмүгэр биһиги бииргэ үөрэнэр оҕолорбутуттан Ариан Неустроев (50 кг.) – 1 миэстэ, Виталий Петров (60 кг.) – 3 миэстэ ыллылар уонна Дьулус Боппосов (70 кг.) ыйааһыҥҥа — кыайыылааҕынан буолбутум. Ону таһынан 11 кылаас үөрэнээччитэ Андрей Товаров 70 киилэҕэ кыттан, 3 миэстэ буолары ситистэ. Күрэхтэһии кэнниттэн Варваровкатааҕы «Муора сулуһа» диэн дайвинг киинигэр бара сылдьыбыппыт. Онно инструктордар уу анныгар сатаан сылдьарга, сөптөөхтүк тыынарга үөрэтэн, чаас аҥаара ууга арыаллыыллар. Уу анныгар хаһан да сылдьыбатах дьоҥҥо олус интэриэһинэй этэ. Хара Муора анныгар музей курдук экспонаттар бааллар эбит, холобур, эргэ пушка, дьаакыр, миинэ, бэлэсипиэт, биллиилээх дьоннор бүүстэрэ. Мин олус ыраас уулаах муора аннынааҕы үүнээйилэри, бытархай балыктары 6-9 миэтэрэҕэ тиийэ түһэн, сонургуу көрдүбүт. Муора түгэҕэр тиийэн, В.И. Ленин бүүһэ баарын көрөн олус соһуйбутум уонна үөрбүтүм. Инструкторбар этэн хаартыскаҕа түһэртэрбитим. Бу хаартыскам социальнай ситим нөҥүө дьон-сэргэ киэҥ сэҥээриитин ылан, киэҥ эйгэҕэ тарҕанан, төлөпүөнүнэн сураһааччы үксээтэ. Өссө биир сонун сырыыбытынан аквапарка буолбута. Ол курдук хаһан да сылдьа илик сирбитигэр тиийэн, дуоһуйа сөтүөлээбиппит. Биир күн көҥүллэтэн, Анапаҕа олорор дьоммор Михайловтарга баран хонон кэлбитим эмиэ олус үөрүүлээх этэ. Анапаҕа баран сонуну көрөн, күрэхтэһиигэ кыайан кэлбитим олоҕум биир умнуллубат түгэнинэн буолла. Кыһамньылаах тренербитигэр Артаньян Макаровичка, үөрэнэр оскуолабытыгар, төрөппүттэрбэр, аймахтарбар улахан махталбын тиэрдэбин.
Дьулус Боппосов, Уолба орто оскуолатын 9 кылааһын үөрэнээччитэ, «Мадьыны» кулууп иитиллээччитэ.