Уолба нэһилиэгэ «Демография» национальнай бырайыагынан «Доруобай нэһилиэк» сонун бырайыакка үлэлэһэр. Быйыл Өрөспүүбүлүкэҕэ физкультурнай хамсааһын 100 сылыгар анаан элбэх үлэни ыыппыттар. Уолба нэһилиэгин успуорка исписэлииһэ Айтал Семенов кэпсииринэн: “«Доруобай нэһилиэк» бырайыгынан үлэлээбиппит үһүс сылыгар барда. Нэһилиэккэ элбэх успуорт көрүҥнэригэр күрэхтэһиилэри ыытабыт. Нэһилиэк олохтоохторо успуордунан дьарыктаналлар, олус көхтөөхтөр. Хас тэрийбит успуорт көрүҥнэригэр күрэхтэһиилэрбитин хаартыскаҕа түһэрэн, араас социальнай ситимнэргэ таһаарабыт уонна бырайыакпыт сүнньүнэн отчуоттуубут. Ол түмүгэр баннердары, спортивнай көстүүмнэри, мээчиктэри ылбыппыт. Быйыл «Доруобай нэһилиэк» бырайыак сүнньүнэн өрөспүүбүлүкэ сүүс нэһилиэгэр успуорка наадалаах малы-салы түҥэттилэр. Биһиги нэһилиэк бырайыак сүнньүнэн мэтээллэри, грамоталары, кубоктары ыллыбыт, онон үөрүүбүт муҥура суох. Иннибитигэр волейболга, остуол оонньуутугар күрэхтэһии ыытыахтаахпыт, онно наҕараадалыырга бэлэммит. Маннык бырайыакка улуустан Тыараһа, Чөркөөх, Дьүлэй нэһилиэктэрэ эмиэ киирдилэр».
Бу күннэргэ Уолба олохтоохторо бэлэх тутан сүргэлэрэ көтөҕүллэн сылдьар. СӨ Ил Дарханыгар Айсен Николаевка, СӨ Успуорт миниистирин эбээһинэһин толорооччу Леонид Спиридоновка махтаналлара улахан.
Елена Слепцова.