Баайаҕа нэһилиэгэ сылын аайы олохтоох көҕүлээһини өйүүр республикатааҕы программаҕа кыттан, олохтоохтор уопсай мунньахтарынан нэһилиэккэ баар сүрүн кыһалҕалары быһаараллар. Ол курдук ааспыт сылларга Томтор үрдүн чөлүгэр түһэрии, Туос Моҕол Ураһа турар сирин буорунан кутуу, уулуссалары көннөрүү, сайыҥҥы уу ситимин матырыйаалын ылыы, выпускниктар сквердэрин тутуу үлэлэрэ ыытыллыбыттара. Быйылгы ППМИ программатынан ыһыахтыыр түһүлгэни саҥардан оҥоруу үлэтэ уопсай куоластааһынынан талыллан, республика бюджетыттан 2 мөлүйүөн үбүлээһин көрүллүбүтэ. Бырайыагын талааннаах биир дойдулаахпыт Яроев Юрий Васильевич оҥорон, аукцион түмүгүнэн тутуу үлэтин Юрий Васильевич бэйэтин тэрилтэтэ кыайан, 2588000 солк. сууммалаах үлэни Баайаҕа уус уолаттарын түмэн үлэлэтэн, бэрт түргэнник, үрдүк хаачыстыбалаахтык оҥорбуттарынан бары астынныбыт. Удьуор утумун салгыыр айар талааннаах ыччаппыт Яроев Юрий архитектор идэлээх, төрөөбүт дойдутун гербэтин, Баайаҕа киин аркатын, арахсыы суолга туруоруллубут БаайАҕа бэлиэтин, «Алгыстаах аартык» выпускниктар сквердэрин бырайыагын автора, өссө да үгүс үтүө бырайыактары олоххо киллэрэн, дойдутун сайдыытыгар кылаатын киллэриэ диэн эрэнэбит.
