Бэҕэһээ тохсунньу 24 күнүгэр күнүс 14:00 чаастан Таатта народнай театрыгар нэһилиэнньэ Кыайыы знамятын уонна “Куттала суох Арктика-2025” экспедиция кыттыылаахтарын үөрүүлээх көрсүһүүтэ буолла.
Кыайыы Знамята «Бары бииргэ — кыайыыга!» диэн девизтээх өрөспүүбүлүкэ улуустарын барыларын кэрийэн, ыам ыйыгар Дьокуускай куоракка кэлиэхтээх.
Сэбиэскэй дьон нус-хас олоҕун атыйахтаах уу курдук аймаабыт, элбэх сүтүгүнэн, хоргуйуунан, эрэйи-муҥу көрсөн алдьархайдаах сэриигэ кыайыыны аҕалбыт төрүттэрбит, эһэлэрбит, эбэлэрбит үтүө ааттарыгар сүгүрүйэр, бойобуой кыыһар Кыһыл былаахтарын чиэстиир тэрээһин Арассыыйа, Саха сирин гимнин уонна аҕам саастаах дьон хорун толоруутугар Таатта өрөгөй ырыатынан саҕаланна. Былааҕы сыанаҕа үс эдэр уол киллэрбиттэрин сүһүөххэ туран көрүстүлэр.
Бастакынан улуус баһылыгын э.т. Руслан Игнатьевич Захаров тэрээһиҥҥэ Аҕа дойду Улуу сэриитигэр Таатталар хорсуннук кыргыспыттарын, 1950 киһи вроҥҥа барбытыттан 720 эрэ киһи эргиллибитин ахтан туран, бу тэрээһин көлүөнэлэр икки ардыларыгар сибээһи бөҕөргөтөр, Россия норуотун сомоҕолуур, күүһүн-күдэҕин түмэр аналлааҕын бэлиэтээтэ уонна кинилэргэ сүгүрүйэн саҥата суох иһийэн туруу мүнүүтэтин биллэрдэ. Кини кэнниттэн экспедиция салайааччыта, полковник Денис Геннадьевич Фомин МЧС анал сорудаҕынан биир дойдулаахтарбытыгар тыа баһаарын умулларыыга уһулуччу үтүөлэрин иһин Аянитов Семен Дмитриевиһы, Бродников Василий Васильевиһы, Кузьмин Никита Николаевиһы, Тарабукин Василий Семеновиһы «ЫБМ содулларын туоратыы кыттыылааҕа» диэн түөскэ кэтиллэр бэлиэнэн наҕараадалаата.
Тэрээһиҥҥэ АБДь кыттыылааҕа Винокуров Роберт Афанасьевич, быыһыыр сулууспа сэрэтэр отделын начальнига Алексеев Геннадий Геннадьевич, бэтэрээннэр Сэбиэтин Бэрэссэдээтэлэ Маргарита Арисовна Попова, Д.А. Петров кыыһа Петрова Астра Дмитриевна, үлэ, тыыл ветерана Мария Степановна Андросова, Алампа аатынан 1 нүөмэрдээх оскуола 10-с гуманитарнай кылааһын үөрэнээччитэ Алексеева Жанна уоттаах-төлөннөөх тыл эттилэр.
Салгыы улуус бастыҥ ырыаһыттарын толорууларыгар патриотическай хабааннаах эҕэрдэ ырыалар дуорайдылар.
Егорова Январина толоруутугар «Туруйалар».
И.Н. Гуляев аатынан Туора Күөл орто оскуолатын уолаттарын ансаамбыла «То5ус томтор».
Screenshot
Сэриигэ 5 уолун сүтэрбит уонна кинилэртэн хайалара эмэ тыыннаах эргиллиэ диэн олоҕун устата кэтэспит ытык Ийэ Феврония Малгинаҕа анаммыт ырыаны дириҥ иэйиилээхтик ыллаата Зоя Андросова.
Билигин анал байыаннай дьайыыга сылдьар уолаттарбытыгар анаммыт «Төннөөрүҥ, боотурдар» ырыаны Георгий Матаннанов өрө көтөҕүллүүлээхтик, байыаннайдыы темпэлээхтик толордо.
суруйда А. Неустроева,
хаартыскаҕа түһэрдэ М. Дайаана.