Таатта литературнай-художественнай музей сиригэр-уотугар үһүс төгүлүн ыытыллар “Сыгынахтаах Аартык – 2023” мас оҥоһуктарга хамаанданан улуустааҕы күрэс балаҕан ыйын 4-5 күннэригэр буолан ааста.
Быйылгы күрэс Арассыыйаҕа Педагог уонна аҕа сүбэһит (настаабынньык), өрөспүүбүлүкэҕэ Үлэ сылыгар ананна. Күрэс сүрүн тэрийээччитэ «Эрэл” саастарын ситэ илик оҕолору чөлүгэр түһэрэр киин. Киин иһинэн «Биир Түмсүү» кэмиэрчэскэйэ суох тэрилтэ «Саарыннар ыллыктарынан» оскуоланы тэрийэн үлэлэтэр. Быйыл «Саарыннар ыллыктарынан» оскуола СӨ Ил Дарханын Граныгар тиксибитэ. Бу бырайыак чэрчитинэн, маһынан кыһар маастардарга «Сыгынахтаах аартык», «ТааттаМУУС-2023» мууһунан кыһар маастардарга улуустааҕы куонкурус ыытар. Уол оҕо олоххо бэлэмнээх буоларыгар, сатабыла, айар-тутар дьоҕура сайдарыгар көмөлөөх буолуо диэн санааттан тэриллэр.
Айар түһүлгэҕэ сэттэ хамаанда Туора Күөл, Уолба, Ытык Күөл, Чөркөөх нэһилиэктэриттэн, икки оҕо уонна биир улахан киһи буолан кытыннылар. Быйылгы сорудах көҥүл тиэмэҕэ ыскамыайкалары оҥоруу буолла. Сэттэ хамаанда икки күн устата уһаннылар.
Түмүккэ дьүүллүүр сүбэ быһаарыытынан бары кыттааччыларга анал ааттар иҥэрилиннилэр, сыаналаах бириистэр олохтоннулар. Кыайыылааҕынан «Айылҕа ахтылҕана» диэн үлэни оҥорбут В.Е.Попов, Хомустаан Афанасьев, Егор Капитонов Уолба нэһилиэгин хамаандата буолла уонна 50 тыһыынча солкуобайынан наҕараадаланна. Иккис миэстэни «Айыы Хотой” ыскамыайканы оҥорбут А.П.Атастыров, Саяна Атастырова, Айсен Белолюбскай Дьүлэй нэһилиэгин хамаандата ылла.
Бары кыттыбыт хамаанда үчүгэй бэлэмнээҕин, уус илиилээҕин, кыайыыга дьулуурдааҕын көрдөрдүлэр.
Елена Слепцова.