Тааттатааҕы эдэр натуралистар үлэһиттэрэ сыл аайы 6 тыһыынча оҕуруот аһын араскытын уонна 10-ча тыһыынча сибэккини үүннэрэллэр. 50-н тахса сыл устата үгүс биологтары, быраастары, зоотехниктары үүннэрэн таһаарбыт «Эдэр натуралистар ыстаансыйаларын” кыһата, киэҥ хабааннаах үлэни ыытар. Ол курдук ыстаансыйа дириэктэрэ Николай Им: «Быйылгы былааммыт 20 тыһыынча устуука үүнээйини олордуохтаахпыт, ол иһигэр 15 тыһыынча сибэкки, 6 тыһыынча оҕуруот аһын (помидор, перец, оҕурсуу, дыня уо.д.а.). Арассаадаларбытын олунньу ыйтан саҕалаабыппыт. Былырыын саҥа тэпилииссэ тутан үлэҕэ киллэрэн кэҥээн олоробут. 2025 сылга ыытыллыахтаах «Манчаары оонньууларыгар” Таатта нэһилиэгин кытары 60-ча тыһыынча сибэкки үүннэрэргэ сөбүлэһии түһэрсэн олоробут, онон бэлэмнэнии үлэтин 2021 сылтан саҕалаабыппыт. Ыаллыы олорор Уус Алдан, Амма улуустарын эдэр натуралистарын кытары уопут атастаһан, тэҥҥэ үлэлэһэбит. Бу улуустарга араас өрөспүүбүлүкэтээҕи таһымнаах спартакиадалар ыытыллыбыт буоланнар, араас көрүүлэрэ элбэх, онтон сүбэ-ама ылабыт. Улууска искибиэрдэри киэргэтэргэ анаан улуус дьаһалтатын кытта дуогабардаһан үлэлиибит. Бэйэбит үүннэрэбит, сайынын уу кутабыт, от сыыһын ыраастыыбыт. Учаастакпытыгар соҕуруу дойдуттан кэлбит үүнээйилэр: отонноох мастар, талахтар араас көрүҥнэрэ элбэх. Чааһынай дьоҥҥо анаан оҕурсу, биэрэс, помидор арассаадаларын үүннэрэбит. Быйыл кыһыҥҥы тэпилииссэ туттар баҕалаахпыт, оччотугар кыһыннары үүнээйи олордуо этибит», диэн үлэтин сүнньүн кэпсээтэ.
Билигин ыстаансыйа 20 үлэһиттээх, бары үлэ үөһүгэр сылдьаллар. Бу күннэргэ олордубут арассаадаларын тус туһунан наардыыр түбүккэ олороллор.
Елена Слепцова