Ытык Таатта тарбахха баттыыр биир дьоһун ыалынан Татьяна Дмитриевна уонна Петр Алексеевич Ивановтар быйыл сүрэхтэрин холбоон, Аал уоту оттунан, алаһа дьиэни тэринэн бииргэ олорбуттара номнуо 55 сыллара үүннэ.
Күөх Ньурбаттан төрүттээх ыал амарах аҕата Петр Алексеевич муусука алыптаах эйгэтигэр куустаран, баянист идэтин баһылаан, Саха сирин биллэр мелодиһа Ф.С. Аргунов ыҥырыытын ылынан Тааттатааҕы муусука оскуолатыгар үлэлии киирбитэ.
Хаҥаластан төрүттээх ыал ийэтэ Татьяна Дмитриевна атыы-эргиэн эйгэтигэр өр кэмҥэ таһаарыылаахтык үлэлээбитэ.
Оччотооҕу кэм көхтөөх эдэр ыччата тэрилтэнэн бэстибээлгэ билсиһэн, аара аргыстаһан, устунан истиҥник санаһан, доҕордоспут үтүө кэмнэрин күн бүгүнүгэр диэри умнубаттар.
Ол курдук киэн туттар ыалбыт Ытык Таатта сиригэр-дойдутугар сүрэхтэрин холбоон, олохторун эрэллээх аргыһын булан, быр-бааччы дьоллоохтук олороллоруттан бары да астынабыт.
Иккис дойду оҥостубут дойдулара, тапталлаах Таатталарын салалтата эдэр ыалга дьиэ биэрэн олохсуппуттарыгар махталлара муҥура суох. Билигин элбэх оҕолоох дьоһун ыал элбэх сиэн, хос сиэн тапталлаах эбэтинэн, эһэтинэн буолаллар. Бастыҥ ыалбыт оҕолорун, сиэннэрин үлэнэн иитии бастыҥ холобурун тутуһан, бэйэлэрин үтүө холобурдарынан салайтаран, бары саталбылга уһуйаллар, саха киһитин сиэринэн алаас ахтылҕанын билэ улааталларыгар кыһамньыларын уураллар.
Мария ПАВЛОВА.
Видеоматырыйаалы бэлэмнээтэ Михаил Копырин.