Бу өрөбүлгэ улуус дьаһалтатыгар Таатта улууһун ат спордун федерациятын сүбэ мунньаҕа буолан ааста. Мунньаҕы федерация салайааччыта, улууспут аҕа баһылыгын бастакы солбуйааччы Руслан Игнатьевич Захаров иилээн-саҕалаан ыытта.
Мунньахха аат ааттаан улууспутугар сүүрүк аттарынан дьарыктанар, ат спордун көҕүлээччилэр мустан ирэ-хоро кэпсэтии буолла. Улууспутугар 2025 сылга ыытыллыахтаах XXII Баһылай Манчаары аатынан спорт национальнай көрүҥнэригэр ыытыллар күрэхтэһиигэ ат сүүрдүүтүгэр улууспут хамаандатын бэлэмнээһин, ипподроммутун саҥардыы боппуруостарын сэргэ бу ый 31 күнүгэр Орто Амма нэһилиэгэр ыытыллыахтаах сааскы ат сүүрдүүтүн тэрийии, федерация үлэтин, инники соруктарын тула бэрт үтүө кэпсэтии таҕыста, сэргэх санаа атастаһыыта буолан мунньахха кыттыыны ылбыт уолаттар санаалара кэлэн, инники үлэҕэ чопчу соруктары туруорунан тарҕастыбыт.
Федерация киэҥ ыҥырыылаах мунньаҕын сылга иккитэ ыытарга, сүбэ мунньахтары үс ыйга биирдэ ыытарга диэн быһаарыы ылылынна. Ону сэргэ республикаҕа баар бастыҥ үлэ уопуттарын кытта билсэн олоххо киллэриэҕин диэн сүбэ олохтонно. Бары тэрээһин үлэлэри ыытарга, ылаллар быһаарыылары олоххо киллэрэри уопсай сүбэнэн ылынан, көхтөөхтүк үлэҕэ кыттаһан ыытар оруннааҕын ыйан туран федерация саҥа састаабын сүбэтэ күн бүгүн тирээн турар үгүс боппуруостарга суһал быһаарыылары ыларыгар диэн этии киирэн өйөннө.
Дьэ онон түмүктээн эттэххэ Ытык Тааттабытыгар ат сүүрүүтүн көҕүлүүргэ саҥа соруктар турдулар, былааннар ылылыннылар.