ОЛОҤХО — өйү түмүү,
Санааны уһугуннарыы,
Көмүскэллээх буолуу!
2024 сыл үөрэх дьылыгар, алтынньы ый бүтэһик күннэригэр, Чөркөөх бөһүөлэгэр «Көһөҥө көмүстэрэ» оҕо лааҕыра үлэлээн ааста. Барыта 15 үөрэнээччи, үс улуустан — Амма, Мэҥэ Хаҥалас, Таатта оҕолоро олоҥхо толоруутугар үөрэнэн, чочуллан уонна бэйэлэрин сатабылларын, талааннарын үллэстэн тарҕастылар. Ону таһынан бэйэ-бэйэҕэ сыһыаны, доҕордоһуу, сомоҕолоһуу диэннэргэ, эттэринэн-сииннэринэн, ис санааларынан билэн-көрөн, үөрэн-көтөн, инникигэ соруктаах-ыра санаалаах, төрөөбүт дойдуларыгар төнүннүлэр.
Лааҕыр толкуйдаммыт киэҥ барыла олоххо киирдэ. Бастатан туран салайар, уһуйар, бииргэ үлэлэһэр састаап табатык таҥыллыбыт. Лааҕырга үс уһуйааччы: Амма улууһуттан С.О.Иванова, Тааттаттан А.В.Шестаков, Р.С.Маркова, ону таһынан, лааҕыр салайааччылара Ю.В.Борисова, күнүскү-түүҥҥү иитээччилэр, воспитателлар, айа-тута күргүөмнээхтик үлэлээтилэр, маны кытта, иҥэмтэлзэх аһынан-үөлүнэн хааччыйбыт сайаҕас, эбээ курдук үлэһиттэр тигинэччи күҥҥэ биэстэ аһаттылар.
Иккиһинэн, олоҥхо толорооччулар олоҥхо үөрэтиитинэн эрэ муҥурдамматылар Олоҥхо — Олох диэн өйдөбүлүн дириҥэтэн, билиини-көрүүнү үксэтэн, өйү-санааны сааһылаан, сүөм курдук үрдээтилэр, үөл тиит курдук бөҕөргөөтүлэр. Көрбүт- билбит, истибит, сөхпүт сирдэрбитинэн буоллулар… Былатыан Ойуунускай төрөөбүт уонна улааппыт алааһыгар дуоһуйа сырыттыбыт.
Чөркөөтөөҕү аһаҕас халлаан түмэлэ (И.Я.Жерготова) өркөн өйү соһуттулар, нохтолоох сүрэҕи үөртүлэр.
Б.Ойуунускай аатынан Государственность түмэлэ (А.С.Борисова) оччотооҕу кэми өйдөөһүҥҥэ , билиҥҥи кэми анаарыыга, көмөлөстөҕө буолуо диэн эрэнэбит. Олоҥхоһуттары кытта көрсүһүү туспа туһалаах дьайыылаах буоларын, дьыл-хонук аастаҕына, эдэр олоҥхо толорооччуларбыт, эбии өйдүөхтэрэ диэн үөрэбит.
Манна кытыннылар: Ийэ олоҥхоһут П.Е.Решетников төрөппүт кыыһа Докторова Р.П, «Удьурҕай- Таатта» этнобөлөх олоҥхо толорооччулара Слепцова Т.Е., Шестаков А.В., Дъячковскай Н.Р., Егорова М.Р., бөлөх салайааччыта Тарабукина М.В.
Салгыы «Алгыстаах алаадьынан» көрүстүлэр, Алгыс көтөхтүлэр Н.Н.Туласынов аатынан НАДь (Обоюкина А.М.), үлэһиттэрэ, «Иҥэмтэлээх эмтээх от чэйдэринэн» күндүлээтилэр «Алаһа» түмсүү, салайааччы Сивцева Д.А.
«Дьиэ харысхалын» (Иванова Ю.В.) хас биирдии лааҕыр оҕолоро оҥордулар уонна санаалара чугас дьонноругар бэлэх ууннулар. Умсугутуулаах «Өбүгэ оонньуулара» (Андреева Л.М.) тэрээһиҥҥэ баар эрэ бары кытынныбыт. Уус Тааттаттан Нелли Баратова хабылык күрэскэ кимиэхэ да иннин биэрбэтэ.
Онтон, » Олоҥхо омуннаах суолунан» (реж. Яковлева М.П.) олоҥхо сүрүн дьоруойдарын көстүүмнэрин кэтэрдэн, мини-спектакль туруорбута, оҕолорго, олохторун былаһын тухары, саныы-үөрэ сылдьалларыгар, сулус курдук ыҥыра-угуйа турарыгар, бигэтик эрэнэбит. Сарсыардааҥы хамсаныылар — зарядка спортивнай залга, куттары- үөрдэрэ уһугуннарара олус үчүгэй. Ити курдук, барыта холбоон, ситэриллэн-туолан, олус сэргэхтик үлэлээтибит, бэйэбит эмиэ элбэҕи аастыбыт, үгүскэ үөрэннибит.
Лааҕыр 5 сылга биирдэ үлэлиир. Бу сырыыбыт иккис төгүлэ. «Көһөҥө көмүстэрэ» лааҕыр дьөксө үбүлэнэн, сылын да аайы үлэлиирин өйүө этибит.
Ийэ олоҥхоһут Көһөҥө Бүөтүр аатынан стипендиата, Лааҕыр уһуйааччыта Р.С. Маркова