А.Е.Мординов аатынан Таатта лицейин учууталларын «Умсулҕан» хоһоон ааҕар бөлөҕө тэриллибитэ үһүс сылыгар барда. Бары ыытыллар куонкурустарга ситиһиилээхтик кыттар.
Ол курдук учууталлар идэлэрин үрдэтэр үнстүтүүт нуучча тылын уонна литературатын кафедрата тэрийэн ыытар XII — с төгүлүн хоһоонньуттар күрэхтэрэ олунньу 4 күнүгэр буолла. «Ааспыт сылларга сүгүрүйэбит» диэн ааттаах Кыайыы 80 сылыгар анаммыт өрөспүүбүлүкэтээҕи куонкуруска уон сэттэ кыттааччыттан бастакы миэстэҕэ «Умсулҕан» аата ааттанна. Салайааччы Оксана Андросова – Сандаара саха тыла диэн баран муннукка ытаабыт киһитин билэҕит. Лицей дириэктэрэ Изабелла Сивцева бэйэтинэн кэлэн кытта сылдьара атын оскуолаларга үтүө холобур буолар. Галина, Александра Федоровалар поэзия эйгэтигэр оҕолору куруутун дьарыктыыллар. Бу бөлөх Макар Хара хоһооннорунан литературнай-музыкальнай композиция туруорда. Манна хоһоон, ырыа, тойук — үс жанрынан бэртээхэйдик көрдөрдүлэр диэн саха драматическай театрын артыыһа Татьяна Легантьева хайҕаата. Сылын аайы көтүппэккэ кыттар Амма лицейин бөлөҕө нууччалыы тылынан ааҕан Кылаан Чыпчаал буолла. Бу маннык куонкуруска аан бастакытын кыттар “Умсулҕан” бөлөх өссө даҕаны көрөөччүлэри үөрдэ, оҕо-аймахха ааҕар ньыманы үөрэтэ-такайа, уус-уран литература хайысхатын сайыннара туруо.
